Царевич Димитрий (скульптуралы портрет)

Скульптура шаһзатты тулы буйы менән һүрәтләй. Фигура натуралистик манерала башҡарылған. Башы бер аҙ уңға боролған һәм саҡ ҡына эйелгән. Уң ҡулы төшөрөлгән, ус асыҡ. Һул ҡулы бөгөлгән һәм бәрәсте (ҡуҙыны) ҡыҫып тора. Кейеме оҙон. Кейемдең аҫҡы өлөшө билбау менән быуылған һәм итәге, яғаһы, еңдәре, алғы планкаһы орнамент менән биҙәлгән. Өҫкө туны асыҡ. Башында тәре менән осланған таж урынлашҡан. Йөҙ һыҙаттары айырыуса ентекле эшләнгән: күҙҙәре аҫҡа төбәлгән, танауы тар, ауыҙы бәләкәй, аҫҡы ирене тулы, сәстәре тулҡынлы, артҡа тарап һалынған. Скульптура бейеклеге 3,5 см булған квадрат постаментҡа ҡуйылған, уға графит ҡәләм менән «777» тигән яҙыу төшөрөлгән. Постамент менән бергә үлсәме 113,4×37×30 см, постаментһыҙ — 110×37×30 см.

Төп материалы — гипс. Скульптураны эшләү өсөн әүәләү һәм ҡойоу техникалары ҡулланылған. Гипс ваҡ деталдәрҙе һәм текстураларҙы моделләштерергә мөмкинлек бирә. Был техникаларҙы ҡулланыу портреттың юғары дәрәжәлә деталләштерелеүен тәьмин итә.

Экземпляр Углич дәүләт тарихи-архитектура һәм сәнғәт музейында күрһәтелә. Музейға 1892 йылда нигеҙ һалынған. Экспозиция Углич кенәздәре биналарында, XIX быуатта үҙгәртеп ҡоролған Богоявление соборында һәм Углич ҡалаһының (Ярославль өлкәһе) башҡа тарихи биналарында урынлашҡан.