Һыбайлы башҡорт

Статуяла ат өҫтөндә ултырған башҡорт һынландырылған. Башҡорт милли кейемдә: ҡыҫҡа еңле кәзекәй, уның аҫтында оҙон еңле күлдәк, оҙон ҡуныслы итектәр һәм башында түбәтәй. Һул ҡулында — йүгән, ә уң ҡулын аҫҡа төшөрөлгән. Ат эйәренең һул яғында фляга беркетелгән. Ат фигураһы мөйөштәре түңәрәкләнеп эшләнгән тура мөйөшлө нигеҙгә ҡуйылған. Нигеҙҙең өҫкө өлөшөндә үлән, сәскәләр һәм ботаҡтар рельефлы итеп һынландырылған. Нигеҙҙең һул ситендә «раб. Торокин» тигән ҡултамға ҡуйылған. Артҡы яғында рам эсендә завод һәм формовщик тамғалары — «КАС.З.1909 М.ТОРОКИНЪ», һәм ике башлы бөркөт һүрәте менән түңәрәк штамп бар. Статуяның үлсәмдәре — 19×20×8,5 см.

Статуяны эшләү өсөн суйын ҡойоу технологияһы ҡулланылған. Буяу һәм сүкеү ҡулланылыуы кейемдәге һәм скульптура нигеҙендәге рельефлы биҙәк элементтарын айырып күрһәтергә мөмкинлек бирә. Әҫәрҙә ҡулланылған материал скульптураға юғары ныҡлыҡ һәм оҙайлы һаҡланыу сифаттарын тәьмин итә.

Экспонат Санкт-Петербург Ҡала скульптураһы дәүләт музейында^[ru] һаҡлана. Музей 1932 йылда нигеҙләнгән һәм төрлө халыҡтарҙың тарихын һәм традицияларын сағылдырған монументаль сәнғәт әҫәрҙәре һәм һәйкәл макеттары тупланған әһәмиәтле мәҙәни учреждение булып тора.