Жигарев Павел Фёдорович

Жигарев Павел Федорович 1900 йылдың (6 (19) ноябрендә Тверь губернаһы Бриково ауылында фәҡир крәҫтиән ғаиләһендә тыуа. Урыҫ. 1919 йылдан Эшсе-Крәҫтиән Ҡыҙыл Армияһында. 1920 йылдан РКП(б) ағзаһы. 1919—1920 йылдарҙа Тверҙә запастағы кавалерия полкында хеҙмәт итә, Граждандар һуғышының төп хәрби хәрәкәттәрендә ҡатнашмай.

1922 йылда РККА комсоставының 4-се кавалерия мәктәбен тамамлай, һуңынан кавалерия взводы менән командалыҡ итә. 1925 йылдан үҙ теләге менән авиацияға күсә һәм уҡырға ебәрелә. 1927 йылда Ленинград осоусы-күҙәтеүселәрҙең хәрби мәктәбен тамамлай. Бер нисә йыл хәрби-авиация уҡыу йорттарында уҡыта. 1932 йылда — РККА-ның профессор Н. Е. Жуковский исемендәге Хәрби-һауа академияһын, 1933 йылда уның ҡарамағындағы адъюнктураны тамамлай. Шул уҡ йылдан — Качи осоусылар юғары авиация мәктәбе штабы начальнигы, шул уҡ ваҡытта үҙе лә хеҙмәт бурысын үтәүе менән бер рәттән ошо мәктәпте тамамлай.

1934—1936 йылдарҙа авиация частары — айырым эскадрильянан алып авиабригадаға тиклем — менән командалыҡ итә. 1937—1938 йылдарҙа совет осоусылары-ирекмәндәр төркөмөн етәкләп Ҡытайҙа командировкала була. Япон-Ҡытай һуғышында Чан Кайши хөкүмәт ғәскәрҙәре яғында хәрби хәрәкәттәрҙә ҡатнаша, япон авиация һөжүмен кире ҡағыуҙы, һауа һөжүменә ҡаршы оборона ойоштора, Ҡытай осоусыларын совет самолеттарында күнектерә.

Жигаревтың Ҡытайҙағы эшмәкәрлеге юғары баһалана һәм унан ҡайтҡас, 1938 йылдың сентябрендә РККА Хәрби-Һауа көстәренең Хәрби әҙерлек идаралығы начальнигы итеп тәғәйенләнә. 1939 йылдан — 2-се айырым Алыҫ Көнсығыш армияһы Хәрби-Һауа көстәре командующийы. 1940 йылдың декабренән — РККА Хәрби-Һауа кәстәренең Баш идаралығы начальнигының беренсе урынбаҫары, ә 1941 йылдың апреленән — начальник. Авиация генерал-лейтенанты (4.06.1940).