Маниловтар (скульптура)

Форманың авторы — Борис Яковлевич Воробьёв. Тәүҙә скульптура бисквиттан — глазурь менән ҡапланмаған, тоноҡ өҫлөклө фарфорҙың айырым бер төрөнән эшләнгән. Скульптураны Иван Иванович Ризнич биҙәгән. Был эш 1921 йылда Мәскәүҙә нигеҙ һалынған ХХ быуат Дәүләт әҙәбиәт музейында һаҡлана. Музей коллекцияһында 600 меңдән ашыу һаҡлау берәмеге иҫәпләнә һәм ул билдәле яҙыусыларҙың тормошо һәм ижады менән бәйле предметтарҙы үҙ эсенә ала.

2015 йылда скульптура ҡаты фарфорҙан Европала иң боронғо, Рәсәйҙә художестволы фарфор изделиелары етештереү буйынса беренсе һәм иң ҙур предприятиеларҙың береһе булған Император фарфор заводында ҡойола^[2].

1936 йылдан Б. Я. Воробьёвтың эше Ломоносов исемендәге фарфор заводы (ЛФЗ) менән бәйле була. Скульпторҙың күп эштәрен завод күпләп сығара, йыш ҡына автор исеме урынына үҙенең келәймәһен генә ҡуя.

Хайуандарҙың скульптура һүрәттәренән тыш, 1950-се йылдарҙа Борис Яковлевич Гоголь әҫәрҙәрен иллюстрациялаған скульптуралар серияһы өсөн формалар эшләй.

• Н. В. Гоголдең «Үле йәндәр» поэмаһы персонаждары (1952—1954)^[3]:
  • «Чичиков», «Ноздрёв», «Плюшкин», «Коробочка», «Маниловтар», «Собакевич»,
• Н. В. Гоголдең «Ревизор» комедияһы персонаждары^[3]:
  • «Городничий», «Хлестаков», «Бобчинский һәм Добчинский»

Скульптура ҡараңғы ҡаймалы аҡ постаментта эшләнгән. Унда Н. В. Гоголдең «Үле йәндәр» поэмаһы персонаждары — Маниловтар һүрәтләнгән^[1]. Персонаждарҙың йөҙҙәре бер яҡҡа боролған. Фигураларҙың бер аяғы алға сығарылған, был композицияға динамика өҫтәй. Ир-ат фигураһы ҡулдарының ус төптәрен бер-береһенә ҡыҫып тора, ә ҡатын уны ҡултыҡлап алған. Кейемдәре ентекле эшләнгән. Ир-ат ҡара ботинка, аҡ һәм ҡара өҫтәмәле көрән салбар, ҡара яғалы ҡара-йәшел пинжәк, ҡыҙыл-көрән галстук һәм аҡ күлдәк кейгән. Ир-ат фигураһының сәстәре аҡһыл-һары, юғары кәкелле. Ҡатын-ҡыҙ фигураһы ҡыҙыл туфлиҙа һәм селтәрҙәр, бантиктар һәм сәскәләр менән биҙәлгән аҡ күлдәктә һүрәтләнгән. Фигурала алһыу накидка бар, ә сәстәре матур итеп йыйылған.

Изделие фарфорҙан глазурь аҫты биҙәге ҡулланып эшләнгән. Был ысул сағыу һәм ентекле һүрәттәр яһарға мөмкинлек бирә.

Скульптура 1985 йылда нигеҙ һалынған Немец антифашистарының мемориаль музейында һаҡлана. Музей Красногорск ҡалаһында урынлашҡан. Уның экспозицияһы антифашистик хәрәкәткә арналған һәм Икенсе донъя һуғышы осоро тарихы менән бәйле коллекцияларҙы үҙ эсенә ала.