Хәлфетдинова Гөлнара Нәжип ҡыҙы

Гөлнара Нәжип ҡыҙы Хәлфетдинова 1978 йылдың 18 июлендә Башҡорт АССР-ының Әбйәлил районы Хәмит ауылында тыуған.

Рәми Ғарипов исемендәге 1-се Башҡорт республика гимназия-интернатын тамамлай^[2].

Юғары белемде Башҡорт дәүләт университетында, башҡорт филологияһы һәм журналистика факультетында ала. 2000—2012 йылдарҙа Башҡортостан юлдаш телевидениеһының «Тамыр» балалар каналында мөхәррир булып эшләй.

2012—2020 йылдарҙа — «Башҡортостан ҡыҙы», «Шоңҡар» журналдарында бүлек мөхәррире була.

2020 йылдан «Ағиҙел» әҙәби журналының әҙәбиәт бүлеге мөхәррире^[1].

Халыҡ медицинаһының хиджама төрөн, һөлөк менән дауалау ысулдарын үҙләштерә^[2].

«Тамыр» балалар каналында эшләгәндә балалар өсөн бик күп фильмдарға сценарий яҙа, башҡорт телендәге беренсе «Нурбостан» йәнһүрәт сериалы авторы. Балалар өсөн уның шиғырына яҙылған 200 самаһы йыр бар. Ике китап авторы. Халыҡ-ара һәм Бөтә Рәсәй әҙәбиәт фестивалдәре ҡатнашыусыһы^[1]. Ғағауыз, үзбәк, яҡут (саха), ҡаҙаҡ һәм башҡа телдәрҙә ижад иткән шиғырҙарын башҡорт теленә тәржемә итә. Үзбәкстандағы «Китап донъяһы» халыҡ-ара әҙәби платформаһында үҙ хәбәрсе лә булып эшләп ала. 8 йыл дауамында «Уфа» журналында «Я учу башкирский» тип аталған рубрика алып бара, башҡорттарҙың онотолоп барған йолалары менән таныштыра^[2].

Китаптары

• «Ҡыңғыраулы ғына яланда»
• Бәхет һурпаһы : [шиғырҙар] / Гөлнара Хәлфетдинова. Ваҡыт сыңы : [шиғырҙар] / Рита Фәтҡуллина. — Өфө : Китап, 2022. — 301, [1] с.;

Тормош иптәше менән Гөлнәзирә исемле ҡыҙ һәм Сөләймән исемле ул үҫтерә^[2].

• Рәми Ғарипов исемендәге премия лауреаты.
• Рәшит Назаров исемендәге премия лауреаты.
• Төрки донъяһының Кайгусуза Абдала исемендәге халыҡ-ара премия лауреаты^[1][3].