Рус телендәге версияМахсус проекттар
Телде алмаштырырға
РУВИКИ ТУРАҺЫНДА

Ҡотлоғәлләмов Ғарифулла Шәрифулла улы

РУВИКИ интернет-энциклопедияһында Ҡотлоғәлләмов фамилиялы башҡа кешеләр тураһында мәҡәләләр бар.

Ғарифулла Шәрифулла улы Ҡотлоғәлләмов (рус. Кутлугаллямов Гарифулла Шарифуллович; 1965 йылдың 5 октябре, Сапай, Башҡорт АССР-ы) — мәғариф, муниципаль һәм дәүләт органдары хеҙмәткәре, йәмәғәтсе. 2017 йылдан Көньяҡ-көнбайыш район-ара халыҡты эш менән тәьмин итеү үҙәге директоры. Дәүләкән районы башҡорттары ҡоролтайы етәксеһе. Башҡортостан Республикаһының мәғариф отличнигы[1].

Биографияһы

Ғарифулла Шәрифулла улы Ҡотлоғәлләмов 1965 йылдың 5 октябрендә Башҡорт АССР-ының Дәүләкән районы Сапай ауылында күп балалы колхозсы ғаиләһендә тыуған. Дәүләкән районы Ҡыҙрас урта мәктәбен тамамлағас, 1981—1985 йылдарҙа Бәләбәй ауыл хужалығын механизациялау һәм электрләштереү техникумында уҡый, техник-механик һөнәрен ала.

1985—1986 йылдарҙа Совет Армияһы сафында хеҙмәт итә.

1986—1994 йылдарҙа Дәүләкән районы Сапай ауылы клубы мөдире булып эшләй, бер үк ваҡытта Башҡорт дәүләт университетының башҡорт теле һәм әҙәбиәте факультетында ситтән тороп уҡый.

1996 йылдың авгусынан алып 1998 йылдың 1 сентябренә тиклем Сапай муниципиаль башланғыс мәктәбе директоры.

1998[1999 йылдарҙа Дәүләкән районы Ҡыҙрас урта мәктәбе директоры.

1994—2006 йылдарҙа Ҡыҙрас ауыл Советы хакимиәте башлығы.

2006—2007 йылдарҙа Өфө политехник техникумының Дәүләкән ҡалаһы филиалы директоры.

2007 йылдың апреленән алып 2014 йылдың июленә тиклем Башҡортостан Республикаһы Дәүләкән муниципиаль районы администрацияһының мәғариф бүлеген етәкләй. 2014 йылда «Иң яҡшы муниципиаль хеҙмәткәр» конкурсы еңеүсеһе булып таныла[2].

2008 йылда Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһын тамамлай.

2014—2016 йылдарҙа Дәүләкән районы хакимиәте башлығының социаль һәм кадрҙар сәйәсәте буйынса урынбаҫары[1].

2017 йылдан Дәүләт ҡаҙна учреждениеһы филиалы көньяҡ-көнбайыш район-ара халыҡты эш менән тәьмин итеү үҙәге директоры.

Маҡтаулы исемдәре һәм башҡа бүләктәр

  • «Бөтә Рәсәй халыҡ иҫәбен алыу буйынса күрһәткән ҡаҙаныштары өсөн» миҙалы (2008)
  • Башҡортостан Республикаһының мәғариф отличнигы (2010)
  • «Иң яҡшы муниципиаль хеҙмәткәр» (2014)
  • «2014 йылғы XXII ҡышҡы Олимпиада уйындары һәм XI ҡышҡы Паралимпиада уйындары» иҫтәлекле миҙалы, Сочи ҡалаһы (2014)
  • 3-сө класлы Баш муниципиаль кәңәшсе.

Йәмәғәт эшмәкәрлеге

  • Дәүләкән районы башҡорттары ҡоролтайы рәйесе

Ғаиләһе

Өйләнгән, ике ул, бер ҡыҙ тәрбиәләп үҫтергән.

Иҫкәрмәләр

  1. ↑ 1 2 Давлекановский район. «Наши славные педагоги». — Уфа: «Валькирия», 2016 г.. — С. 16.
  2. ↑ Новости Уфы. Кутлугаллямов Гарифулла Шарифуллович

Һылтанмалар

Категориялар