Андреев Игорь Владимирович
Игорь Владимирович Андреев (рус. Игорь Владимирович Андреев; 1956 йылдың 28 сентябре, Мәскәү) — хәҙерге бишбәйге буйынса сығыш яһаған совет спортсыһы[1]. СССР йыйылма командаһы составында Европа Кубогы эйәһе һәм шәхси зачётта көмөш призёры (1983)[1]. Шәхси һәм команда зачётында СССР чемпионатының бронза призёры (1982)[1]. СССР-ҙың халыҡ-ара класлы спорт мастеры (1983)[1].
Биографияһы
1956 йылдың 28 сентябрендә Мәскәүҙә тыуған.
Спорт әҙерлеген Өфө ҡалаһында «Динамо» физкультура-спорт йәмғиәтенең Башҡортостан өлкә советында тренерҙары В. А. Абрамов, В. С. Голиванов һәм Г. Г. Ефимов етәкселегендә үтә.
1978 йылда инженер һөнәре буйынса Өфө нефть институтын тамамлай.
1980—1984 йылдарҙа СССР һәм РСФСР-ҙың хәҙерге бишбәйге буйынса йыйылма командалары ағзаһы була.
1994 йылда Рәсәй Федерацияһы Эске эштәр министрлығының Юғары инженер янғын-техник мәктәбен тамамлай[1].
Спорт ҡаҙаныштары
1982 йылда хәҙерге бишбәйге буйынса СССР чемпионатында шәхси беренселектә һәм команда зачётында ике бронза миҙал яулай.
1983 йылда халыҡ-ара уңышҡа өлгәшә: Советтар Союзы йыйылма командаһы составында Европа Кубогы уйынында еңеү яулай, шулай уҡ шәхси беренселектә турнирҙың көмөш призёры була[1].
Шул уҡ 1983 йылда юғары спорт һөҙөмтәләре өсөн СССР-ҙың халыҡ-ара класлы спорт мастеры тигән маҡтаулы спорт исеменә лайыҡ була[1].
Бөтә Союз, Бөтә Рәсәй һәм халыҡ-ара ярыштарҙа бер нисә тапҡыр еңеүсе һәм призёр була[1].
Бүләктәре
- СССР-ҙың халыҡ-ара класлы спорт мастеры (1983 йыл)[1].
Иҫкәрмәләр
Әҙәбиәт
- Башҡорт энциклопедияһы: 7 томда / баш мөх-р М. Ә. Илһамов. — Өфө: Башҡорт энциклопедияһы, 2005. — Т. 1: А — Б. — 624 с. — ISBN 5-88185-053-X..