Баһауетдинова Таңһылыу Сәйфетдин ҡыҙы

Таңһылыу Сәйфетдин ҡыҙы Баһауетдинова 1967 йылдың 11 июнендә Башҡорт АССР-ының Бөрйән районы Байғаҙы ауылында тыуған. Байғаҙы ауылындағы һигеҙ йыллыҡ мәктәпте тамамлағандан һуң, 9–10-сы синыфтарҙы Иҫке Собханғол урта мәктәбендә уҡый. Мәктәпте тамамлағас, бер аҙ ауыл клубында художество етәксеһе, һуңынан ауыл хужалығы тармағында эшләй.

Юғары белем алыу маҡсатында Башҡорт дәүләт педагогия университетының (БДПУ) филология факультетының рус-башҡорт бүлегенә уҡырға инә. Студент йылдарында факультет тормошонда әүҙем ҡатнаша, мәҙәни саралар ойоштора, «Тамсылар» әҙәби ижад түңәрәген етәкләй.

Уҡыуын бөткәс, тыуған районына ҡайтып, Бөрйән районы Килдеғол һигеҙ йыллыҡ мәктәбендә башҡорт теле һәм әҙәбиәте уҡытыусыһы булып эшләй. Мәктәптә 1997 йылға тиклем педагогик эшмәкәрлек алып бара.

2007 йылдан Бөрйән районының «Таң» гәзите редакцияһында эшләй. Бында бүлек мөхәррире, мөхәррир урынбаҫары, яуаплы сәркәтип вазифаларын башҡара^[1][2].

Таңһылыу Баһауетдинова әҙәби ижад менән мәктәп йылдарынан шөғөлләнә. Тәүге шиғырын 5-се синыфта уҡығанда яҙа. Артабан шиғриәт менән бер рәттән хикәйәләр, парсалар, публицистик мәҡәләләр ижад итә.

Уның шиғырҙары, хикәйәләре һәм мәҡәләләре республика матбуғатында даими баҫылып тора. «Аҡбәкәл» хикәйәһе «Киске Өфө» гәзите ойошторған хикәйәләр конкурсында еңеү яулай һәм «Әҙәби нағыш» йыйынтығына индерелә. «Әҙәби нағыш» әҙәби марафоны сиктәрендә уның ижади эшмәкәрлеге профессиональ әҙәбиәт вәкилдәре тарафынан ыңғай баһалана^[1].