Кәримов Илгиз Мостафа улы
Кәримов Илгиз Мостафа улы (10 ғинуар 1942 йыл — 14 март 2019 йыл) — тәржемәсе, журналист. 1982 йылдан СССР Яҙыусылар союзы ағзаһы. Башҡортостандың халыҡ шағиры Мостай Кәримдең улы.
Биографияһы
Илгиз Мостафа улы Кәримов 1942 йылдың 10 ғинуарында Башҡорт АССР-ының Шишмә районы Келәш ауылында тыуған.
1967 йылда Мәскәү дәүләт университетын тамамлаған. 1977 йылға саҡлы (өҙөклөк менән) РСФСР Яҙыусылар союзының Мәскәүҙә сыҡҡан «Литературная Россия» гәзитендә эшләй, шул иҫәптән 1974 йылдан — бүлек мөдире.
1972 йылдан — СССР-ҙың Телевидение һәм радиотапшырыуҙар буйынса дәүләт комитеты хеҙмәткәре.
1973 йылдан «Молодой коммунист» журналында бүлек мөдире.
1997—2005 йылдарҙа «Оракул» журналы хеҙмәткәре.
Илгиз Кәримов ауырығандан һуң 2019 йылдың 14 мартында Мәскәү ҡалаһында вафат була[1]. 2019 йылдың 17 мартында Мәскәү өлкәһе Мытищи ҡалаһының Волков зыяратында ерләнгән [2][3].
Тәржемә ижады
- 1977 йылда Мостай Кәримдең «Оҙон-оҙаҡ бала саҡ», 1989 йылда «Ауыл адвокаттары», 2004 йылда «Ғүмер миҙгелдәре» әҫәрҙәрен тәржемә иткән.
- 1987 Афзал Таһировтың «Буранлы көндәр» китабына ингән повестарын һәм хикәйәләрен руссаға әйләндерә.
- 1988 йылда Әхиәр Хәкимдең «Думбыра сыңы» романын тәржемәләй.
- Шулай уҡ балҡар, татар, сыуаш һәм башҡа ҡайһы бер халыҡтар яҙыусыларының әҫәрҙәрен рус теленә тәржемә итә.
Ғаиләһе
Халыҡ шағиры Мостай Кәримдең улы.
- Ҡатыны — Нәзифә Харис ҡыҙы Кәримова
- Улы — Нияз Илгиз улы Кәримов
- Ҡыҙы — Айгөл Илгиз ҡыҙы Кәримова[4]
Хәтер
- 2019 йылдың 23 апрелендә Өфөлә Мостай Кәрим исемендәге Милли йәштәр театрында Илгиз Кәримовтың Хәтер кисәһе уҙҙы. Был көндө Мостай Кәримдең «Йәләлетдин атай» китабы буйынса спектакль күрһәтелде. Инсценировка авторы — Илгиз Кәримов[5].
Иҫкәрмәләр
- ↑ Яҙыусы, тәржемәсе, Мостай Кәримдең улы Илгиз Кәримов вафат булған. «Башинформ» мәғлүмәт агентлығы, 2019 йыл, 15 март (Тикшерелеү көнө: 15 март 2019)
- ↑ Умер сын Мустая Карима. Литературная газета.
- ↑ В Москве скончался писатель и переводчик Ильгиз Каримов. Татар-информ.
- ↑ Поэзия – не переводима! Журнал «Уфа».
- ↑ Өфөлә яҙыусы Илгиз Кәримов иҫтәлегенә «Йәләлетдин атай» спектакле күрһәтелде. «Башинформ» мәғлүмәт агентлығы, 2019 йыл, 24 апрель (Тикшерелеү көнө: 24 апрель 2019)
Һылтанмалар
- Кәримов Илгиз Мостафа улы // Башҡорт энциклопедияһы. — Өфө: «Башҡорт энциклопедияһы» ғилми-нәшриәт комплексы, 2015—2020. — ISBN 978-5-88185-143-9. (Тикшерелеү көнө: 10 ғинуар 2022)