Мостафин Әхәт Ғәзизйән улы

1979 йылда Башҡорт дәүләт университетын тамамлаған. Йәйге каникулдарҙа студент төҙөлөш отрядтәрендә ҡатнашҡан^[1]. 1980—1985 йылдарҙа Башҡорт ауыл хужалығы институтында ғилми хеҙмәткәр булып эшләгән; 1985—1999 йылдарҙа — БФАН СССР (Органик химия институты) инженер, кесе, өлкән, баш ғилми хеҙмәткәр.

1999—2000 йылдарҙа — Башҡорт аграр университеты доценты, профессоры.

2000—2002 йылдарҙа — Башҡортостан Республикаһының фән, юғары һәм урта профессиональ белем биреү буйынса Дәүләт комитеты рәйесе урынбаҫары, 2002—2004 йылдарҙа — Башҡортостан Мәғариф министры урынбаҫары. 2004 йылдан — Башҡортостан Республикаһы Фәндәр академияһы вице-президенты.

2007 йылдан Башҡорт университетының физик химия һәм химик экология кафедраһы мөдире.

2009 йылда Башҡортостан Республикаһы Фәндәр академияһының тулы хоҡуҡлы ағзаһы (академик), 2010 йылда — Башҡорт дәүләт университеты ректоры итеп һайланған^[2][3].

2013 йылдан Башҡорт дәүләт университетының физик химия һәм химик экология кафедраһын етәкләгән, баш ғилми хеҙмәткәр булған. 2018 йылдан — Рәсәй Фәндәр академияһының Өфө федераль тикшеренеүҙәр үҙәге рәйесе урынбаҫары. 2019 йылдың 11 июлендә Өфө федераль тикшеренеүҙәр үҙәге рәйесе вазифаһына ваҡытлыса тәғәйенләнгән^[4].

1999 йылда докторлыҡ диссертацияһын яҡлаған; профессор (2003). Башҡортостан Республикаһы Фәндәр академияһы академигы (2009).

Тикшеренеү йүнәлештәре — ароматик аминдар рәтендәге региоспецифик алмашыныу, биологик әүҙем азотлы гетероциклик системалар һәм нуклеозидтарҙы маҡсатлы синтезлау.

12 фән кандидаты әҙерләгән. 400-ҙән ашыу фәнни эш авторы, шул иҫәптән 110 авторлыҡ таныҡлығы һәм уйлап табыу патенты.

• Башҡортостан Республикаһының атҡаҙанған фән эшмәкәре (2007)
• Рәсәй Федерацияһының Мәғариф министрлығы һәм Рәсәй Фәндәр академияһының маҡтау грамоталары