Петропавловский Сергей Анатольевич
Петропавловский Сергей Анатольевич (21 сентябрь 1909 йыл — 16 август 1958 йыл) — тау инженеры-геофизик. Сибай баҡыр-цинк колчеданы ятҡылығын асыуҙа һәм өйрәнеп-тикшереүҙә ҡатнашыусы. III дәрәжә Сталин премияһы лауреаты (1949). Ленин (1953) һәм Хеҙмәт Ҡыҙыл Байраҡ ордендары (1949) кавалеры.
Биографияһы
Сергей Анатольевич Петропавловский 1909 йылдың 21 сентябрендә хәҙерге Вологда өлкәһендә тыуған[1].
Юғары белемле: 1947 йылда Свердловск тау институтын[2] тамамлаған.
1944 йылдан — техник, һуңынан «Уралцветметразведка» тресының үҙәкләштерелгән геофизик партияһы начальнигы (хәҙер — Баженов геофизик экспедицияһы), 1947 йылдан — Союз әһәмиәтендәге Урал геофизик тресының баш инженеры[3].
1956 йылдың майынан Ҡытай Халыҡ Республикаһы Геология министрлығының геофизика буйынса баш инженеры.
Хеҙмәт эшмәкәрлеге Уралда мәғдән геофизикаһының барлыҡҡа килеүе һәм үҫешен өйрәнеп-тикшереүгә арнала. Уның ҡатнашлығында Урта һәм Көньяҡ Уралдағы баҡыр колчеданы ятҡылыҡтарын эҙләүҙә һәм разведкалауҙа тикшеренеүҙәрҙең геофизик ысулдары ҡулланыла[1].
Сибай баҡыр-цинк колчеданы ятҡылығын асыуҙа һәм геологик өйрәнеүҙә туранан-тура ҡатнаша һәм ыңғай һөҙөмтәләргә ирешеүгә тос өлөш индерә. Был хеҙмәт емештәре дәүләт тарафынан тейешле кимәлдә баһалана: 1949 йылда Сергей Петропавловский башҡа хеҙмәттәрштәре менән бергә III дәрәжә Сталин премияһын ала[4].
1958 йылдың 16 авгусында оҙайлы һәм ауыр сирҙән һуң Свердловск ҡалаһында вафат була.
Маҡтаулы исемдәре һәм башҡа бүләктәре
◇ III дәрәжә Сталин премияһы (1949)
◇ Ленин ордены (1953)
◇ Хеҙмәт Ҡыҙыл Байраҡ ордены (1949)
◇ «1941—1945 йылдарҙағы Бөйөк Ватан һуғышында күрһәткән фиҙаҡәр хеҙмәт өсөн» миҙалы
Хәтер
◇ Сергей Петропавловский исеме Башҡортостан Республикаһының Сибай ҡалаһындағы урамға бирелгән[1].
Иҫкәрмәләр
- ↑ 1 2 3 «Башҡортостан» төбәк интерактив энциклопедик порталы. ПЕТРОПАВЛОВСКИЙ Сергей Анатольевич (Тикшерелеү көнө: 3 октябрь 2024)
- ↑ Хәҙер Урал дәүләт тау университеты.
- ↑ Записи Уральского геофизика Ананьевой Евгении Михайловны - часть 2. Проект ГеоГуру. 28 июня 2017 года (рус.) (Тикшерелеү көнө: 3 октябрь 2024)
- ↑ «Башҡортостан» төбәк интерактив энциклопедик порталы. СИБАЙ БАҠЫР КОЛЧЕДАНЫ ЯТҠЫЛЫҒЫ (Тикшерелеү көнө: 3 октябрь 2024)
Һылтанмалар
◇ «Башҡортостан» төбәк интерактив энциклопедик порталы. ПЕТРОПАВЛОВСКИЙ Сергей Анатольевич (Тикшерелеү көнө: 30 сентябрь 2024)
◇ «Башҡортостан» төбәк интерактив энциклопедик порталы. СИБАЙ БАҠЫР КОЛЧЕДАНЫ ЯТҠЫЛЫҒЫ (Тикшерелеү көнө: 30 сентябрь 2024)
◇ Записи Уральского геофизика Ананьевой Евгении Михайловны - часть 2. Проект ГеоГуру. 28 июня 2017 года (рус.) (Тикшерелеү көнө: 30 сентябрь 2024)
◇ Сайт aztekium. Геофизики СССР: Петропавловский, Сергей Анатольевич (рус.) (Тикшерелеү көнө: 30 сентябрь 2024)
◇ БАШЭНЦИКЛОПЕДИЯ (ИНСТИТУТ БАШЭНЦИКЛОПЕДИИ АН РБ). 21 сентября – 115 лет со дня рождения геофизика, лауреата Сталинской премии, кавалера орденов Ленина, Трудового Красного Знамени ПЕТРОПАВЛОВСКОГО Сергея Анатольевича (1909–1958) (рус.) (Тикшерелеү көнө: 2 октябрь 2024)