Хәкимова Светлана Фәрит ҡыҙы

1963 йылдың 21 июнендә Башҡорт АССР-ының Әлшәй районы Иҫке Сәпәш ауылында тыуған. 1-се Раевка урта мәктәбен тамамлағас, Башҡортостан республика мәҙәни-мғрифәтселек училищеһында уҡый. 1983 йылдан Раевка ҡасабаһының мәҙәниәт йортонда эшләй^[1].

1991 йылда хәҙерге Заһир Исмәғилев исемендәге Өфө дәүләт сәнғәт институтын (педагогы Рифҡәт Исрафилов) тамамлай һәм Мәжит Ғафури исемендәге Башҡорт академия драма театрында эшләй башлай һәм хеҙмәтен ошо ижади коллективта дауам итә^[2]. Амплуаһы — лирик-комик геройҙар.

Театр эшмәкәрлегенән тыш, Йырсы булараҡ концерттарҙа сығыш яһай. Уның репертуарында башҡорт халыҡ йырҙары һәм башҡорт, татар композиторҙары (С. А. Низаметдинов, С.Ғ. Садыҡова, Р. М. Хәсәнов) әҫәрҙәре бар^[3]. «Актёр йыры» конкурсы лауреаты^[1].

• Ғәлиәбаныу — «Ғәлиәбаныу», М. Фәйзи;
• Сәрби — «Йәш йөрәктәр», Ф. Бурнаш;
• Ҡарлуғас — «Ҡарлуғас», Б. Бикбай;
• Ләлә — «Аҫылйәр», М. Фәйзи;
• Һандуғас — «Тиле йәшлек», И. Абдуллин (дебют, 1991);
• Сәрүәр — «Башмағым», Х. Ибраһимов;
• Әлфиә — «…Шайморатов-генерал», Ф. Бүләков;
• Хәлимә — «Һөйөү сәғәте һуҡҡанда», Ф. Бүләков;
• Алтынай — «Өҙөлгән туй», З. Атнабаева;
• Негина — «Аҡ ҡанатлы хыялым», А. Н. Островскийҙың «Таланты и поклонники» пьесаһы буйынса;
• Миләүшә — «Айгөл иле», М. Кәрим;
• Көнбикә — «Аҡъял батыр», З. Вәлитов;
• Аҡйондоҙ — «Оҙон-оҙаҡ баласаҡ», М. Кәрим;
• Донна Паскуа — «Кьоджалағы ғауға», К. Гольдони;
• Ынйыбикә — «Эх, кәләше лә, кәләше!», Х. Зарипов;
• Сәлихә — «Көҙән башҡорто», Н. Асанбаев;
• Әсәй — «Артур + Нэнси», А. Дилмөхәмәтова;
• Мәрйәм — «Февраль. Буран...», З. Бураҡаева;
• Альбина — «Бәхет хаҡы», Х. Мөҙәрисова;
• Бикәй — «Аҡ пароход», С. Айытматов;
• Баҙыян — «Маҡтымһылыу, Әбләй һәм Ҡара юрға», Т. Ғәрипова;
• Гөлфинә — «Мин — ҡатын-ҡыҙ», Т. Миңнуллин;
• Гөлшат — «Ике төш», М. Багаев;
• 3-сө Мысыр ҡатыны — «Йософ менән Зөләйха», Ҡол Ғәли;
• Мәрйәм Иршат ҡыҙы — «Мин һинең ҡәйнәң булам», С. Белов;
• Ғәйшә — «Баллы, тирәкле Балтирәк», А. Ишбулдин;
• Элена — «Иң бәхетле төн», А. Касона;
• Бүртә — «Сыңғыҙхандың аҡ болото», С. Айытматов;
• Туҡтабикә — «Ҡыҙ урлау», М. Кәрим;
• Аҡйондоҙ — «Күңел моңдары», Д. Ҡасимов;
• Рәйсә Ильяс ҡыҙы — «Йәш ғаилә фатир эҙләй», М. Рощин;
• Елена — «Балам», В. Емелева;
• Шәмсиә — «Ҡоҙаса», Б. Бикбай, З. Исмәғилев;
• Ямал — «Еҙнәкәй», Х. Ибраһимов;
• Зөһрә Фәрит ҡыҙы — «Йырланмаған йырым һин...», В. Исхаҡов.

Тормошта. Улы — Рәмис Хәмиз улы, Башҡортостан Республикаһының атҡаҙанған артисы (2025), М. Ғафури исемендәге Башҡорт дәүләт академия драма тетары музыканты^[4].

• Башҡортостан Республикаһының халыҡ артисы (2006)
• Башҡортостан Республикаһының атҡаҙанған артисы (1997)