Мөхәмәтғәлина Гөлнара Фаил ҡыҙы

Гөлнара Фаил ҡыҙы Мөхәмәтғәлина (ҡыҙ фамилияһы — Ҡунафина) 1969 йылдың 1 июнендә Башҡорт АССР-ы Бөрйән районының Иҫке Собханғол ауылында тыуған.

Урындағы мәктәптең һигеҙ синыфын тамамлағас, 1984—1987 йылдарҙа Өфө ҡалаһындағы 1-се полиграфистар махсус һөнәри белем биреү училищеһында хәреф йыйыусы һөнәрен үҙләштерә^[1].

Хеҙмәт эшмәкәрлеген 1987 йылда Белорет типографияһында линотип машинаһында хәреф йыйыусы булып башлай, һуңынан версткалаусы була. 1994 йылдан — типографияның ПЭВМ операторы^[1].

2004 йылдан — «Белорет матбуғат йорто» дәүләт унитар предприятиеһының компьютер участкаһы бригадиры, 2010 йылдан — предприятиеның полиграфия производствоһы технологы.

2013 йылдан — «Белорет матбуғат йорто» дәүләт унитар предприятиеһының директор вазифаһын башҡарыусы.

2014 йылда М. Аҡмулла исемендәге Башҡорт дәүләт педагогия университетын «полиграфия» һөнәре буйынса ситтән тороп тамамлай^[1].

2015 йылдан Башҡортостан Республикаһының дәүләт унитар предприятиеһы «„Башҡортостан Республикаһы“ нәшриәт йорто» филиалы — Белорет мәғлүмәт үҙәгенең Белорет ҡала типографияһы директоры.

2016 йылдан — Башҡортостан Республикаһының дәүләт унитар предприятиеһы «„Башҡортостан Республикаһы“ нәшриәт йорто» филиалы — Белорет мәғлүмәт үҙәге директоры. Үҙәк составына «Белорецкий рабочий», «Урал» гәзиттәре редакциялары һәм Белорет типографияһы инә.

• Башҡортостан Республикаһының атҡаҙанған матбуғат һәм киң мәғлүмәт хеҙмәткәре (2022)^[1]
• Рәсәй Федерацияһы Элемтә һәм киң коммуникациялар министрлығының Почёт грамотаһы (2015)^[1]
• Рәсәй Федерацияһының Хеҙмәт ветераны (2015)^[1]

Ире Ринат Әхәт улы Мөхәмәтғәлин менән ике ҡыҙ тәрбиәләп үҫтергәндәр.