Нөктәле өтөр

• теркәүесһеҙ теҙмә ҡушма һөйләмдәге ябай һөйләмдәр араһында
• ҡатнаш ҡушма һөйләмдәге эйәртеүле ҡушма һөйләмдәр араһында.
• теркәүесһеҙ тиң киҫәкле ябай тарҡау һөйләмдәрҙә. Мәҫәлән:

Арыҫландай ирҙәрҙе Йыуаш ҡуйҙай итер хан, Илеңде алыр ҡулыңдан, Ғәскәр алыр улыңдан; Тартып алыр малыңды, Иҫәпкә алыр барыңды; Боғаҙламай эсер ҡаныңды, Үлтермәй алыр йәнеңде, ау, Үлтермәй алыр йәнеңде. (Ҡобайыр)

• тиң хәл әйтемле ябай тарҡау һөйләмдәрҙә. Мәҫәлән:

Киң юлда һуңғы биш йылда Кемдәрҙер килә, донъя тетрәтеп, Уттар яуҙырып, күктәр күкрәтеп; Ерҙе нурлатып, тормош үҙгәртеп; Дуҫты көлдөрөп, дошман илатып; Меҫкен ҡарттарҙың йөрәген һыҙлатып, Ҡолаҡ төбөндә моңдар сыңлатып... (М. Ғафури.);

• теҙмә ҡушма һөйләмдәрҙә. Мәҫәлән:

Берәүҙәр туй үткәрә, икенселәре тыуған көндәрен билдәләй; өсөнсөләр, һаҡалдарын һыйпап, һанаулы ҡалған йылдарҙың ҡәҙерле минуттарын кисерә. (Р. Низамов.);

Теҙмә ҡушма һөйләмдәрҙә нөктәле өтөр ҡуйылһын өсөн, өтөр менән айырылған тиң киҫәктәр, йә айырымланған эйәрсән киҫәктәр йәки хәл әйтемдәре бирелеү талап ителә.

• күп эйәрсәнле ҡушма һөйләмдәрҙә. Мәҫәлән:

Күк йөҙөндә аҙ ғына ла болот әҫәре юҡ ваҡытта, бөтә дала үҙенең күкрәгенә ал, ҡыҙыл, зәңгәр сәскәләр ҡаҙап байрам иткәндә; һауала, ағас башында, ҡурай өҫтәрендә, талдарҙың ботаҡтарында һандуғастар, ялан турғайҙары уҙышып-уҙышып һайрағанда, байып барған ҡояшҡа ҡарап һоҡланаһың, уны яратаһың. (Б. Ишемғолов.);

• ҡатнаш ҡушма һөйләмдәрҙә. Мәҫәлән:

Ай, тыуған ер, тыуған ер Олатайҙар торған ер; Йылҡылары сыңырлап, Һыйырҙары мөңрәп, Ҡуй-һарығы ҡуңырап, Көтөү-көтөү йөрөгән ер; Ятып ҡалған бер бәрәс Йөҙ ҡуй булып үрсер ер; Тороп ҡалған яңғыҙ тай Өйөр булып йөрөр ер; Атам кейәү булған ер, Әсәм килен булған ер; Кендегемде киҫкән ер, Тәмле һыуың эскән ер. («Урал батыр».)