Тыл хеҙмәтсәндәренә һәйкәл (Стәрлетамаҡ)
Тыл хеҙмәтсәндәренә һәйкәл (рус. Памятник труженикам тыла) — Башҡортостан Республикаһының Стәрлетамаҡ ҡалаһындағы һәйкәл.
Һәйкәлде асыу
Монумент Еңеү Көнө алдынан 2010 йылдың 6 майында Бөйөк Ватан һуғышы ваҡиғаларына һәм геройҙарына арналған маршал Г. К. Жуков исемендәге ҡала скверында асылды. Был тантаналы митингта Стәрлетамаҡ ҡалаһы хакимиәте башлығы Вәхит Әбдерәхимов ҡатнашты.
Тасуирламаһы
Һәйкәл призма рәүешендәге бетон стеланан ғибәрәт, уның алғы ҡырҙарында ир-егет һәм ҡатын-ҡыҙ тыл хеҙмәтсәндәре барельефтары урынлашҡан. Түбәндә «БӨТӘҺЕ ЛӘ ФРОНТ ӨСӨН, БАРЫҺЫ ЛА ЕҢЕҮ ӨСӨН» тигән яҙыу бар. Стеланың түбәһендә биш осло йондоҙ ҡуйылған. Монументҡа көрән тротуар плиткаһы түшәлгән, юлда мемориаль плиткалы пьедестал урынлашҡан, унда башҡорт һәм рус телдәрендә: «Стәрлетамаҡ ҡалаһының Тыл хеҙмәтсәндәренә арналған Мемориаль комплекс 2010 йылдың 6 майында 1941-1945 йылдарҙағы Бөйөк Ватан һуғышында еңеүҙең 65 йыллығы хөрмәтенә асылды» тип яҙылған.
Тыл хеҙмәтсәндәренә һәйкәл артында, киң аллеяның ике яғында, һуғыш йылдарында продукция сығарған предприятиеларҙың тасуирламаһы менән ун ике стела ҡуйылған. Артабан был мемориаль комплекста Социалистик Хеҙмәт Геройҙарына бюстар тора.[1]
2015 йылда Еңеү Көнө алдынан скверҙа һуғыш балаларына иҫтәлекле билдә ҡуйыла. Һәйкәл ҡуйыу буйынса эште ойоштороусы — Миҙхәт Хәкимов (йәмәғәт эшмәкәре, өсөнсө саҡырылыш Дәүләт думаһы депутаты).[2]
Иҫтәлекле билдәнең барельефында завод цехында станок артында эшләгән ҡатын һәм үҫмер һүрәтләнгән. Бәләкәй буйлы булғанлыҡтан, малай ағас йәшник рәүешендәге подставкала тора. Барельефтың өҫкө өлөшөндә «БӨТӘҺЕ ЛӘ ФРОНТ ӨСӨН, БАРЫҺЫ ЛА ЕҢЕҮ ӨСӨН» тигән яҙыу бар. Иҫтәлекле билдә көрән гранит плитәләр менән биҙәлгән постаментҡа ҡуйылған. Постаменттың уң яғында был һәйкәлгә арналған иҫтәлекле таҡтаташ бар.