Ураҙбахтин Илдар Миҙхәт улы

Ураҙбахтин Илдар Миҙхәт улы 1954 йылдың 9 майында Башҡорт АССР‑ының Боҙаяҙ районы, хәҙерге Башҡортостан Республикаһының Ҡырмыҫҡалы районы, Атйетәр ауылында тыуған^[1].

1978 йылда Башҡорт дәүләт медицина институтын тамамлай. Шул йылда Өфөнөң 8‑се дауаханаһында хирург булып хеҙмәт юлын башлай. 1979 йылдан Асҡын үҙәк район дауаханаһында, ә 1981 йылдан алып Өфөнөң 21‑се дауаханаһында эшләй. 2004—2014 йылдарҙа Башҡорт дәүләт медицина университетының өстәмә белем биреү институтында уҡыта^[1].

Ураҙбахтин Илдар Миҙхәт улының фәнни эшмәкәрлеге ҡорһаҡ ҡыуышлығы ағзаларында киҫкен хирургик ауырыуҙар булған кешеләрҙе диагностикалауға һәм дауалауға арналған. Ул эндоскопик, эндохирургик тикшереүҙәр үткәрә, туҡымаларҙағы патологик үҙгәрештәрҙе объективлаштырыу өсөн төҫ метрологияһын өйрәнә. Илдар Миҙхәт улы ҡатнашлығында лайлалы тиресәләр колориметрияһы, видеоэндоскопик тикшереүҙәр ваҡытында ишемияны һәм сероз тиресәләрҙең шешеү реакцияһын баһалау ысулдары эшләнгән. Ураҙбахтин 270 самаһы фәнни хеҙмәт авторы, 7 уйлап табыуға патент эйәһе^[1]

— Башҡортостан Республикаһының атҡаҙанған табибы (2005),

— Башҡортостан Республикаһының фән һәм техника өлкәһендәге Дәүләт премияһы лауреаты (2007).

• Хирургия абдоминальных повреждений. М., 2005 (авторҙаш);
• Применение лазерной допплеровской флоуметрии в эндоскопии и эндохирургии при неотложных заболеваниях органов брюшной полости. М., 2006 (авторҙаш).