«Нефтекама» йылдам үҫеш биләмәһе

2016 йылда Нефтекама монойүнәлешле муниципаль берәмектәр (моноҡалалар) исемлегенә индерелә^[2], был һуңынан ҡалаға йылдам социаль-иҡтисади үҫеш биләмәһе статусын рәсмиләштереү хоҡуғын бирә^[3]. «Нефтекама» ТОР-ы, РФ Хөкүмәтенең 2019 йылдың 12 февралендәге «Нефтекама» йылдам социаль-иҡтисади үҫеш биләмәһен булдырыу тураһында"ғы 129-сы Ҡарарына ярашлы, ҡала иҡтисадын диверсификациялау, уның ҡала барлыҡҡа килтереүсе предприятие «Нефтекама автозаводы» асыҡ акционерҙар ойошмаһына бәйлелеген кәметеү һәм ҡаланың инвестиция йәлеп итеүсәнлеген арттырыу маҡсатында булдырыла. Ҡарар йылдам социаль-иҡтисади үҫеш биләмәһенә дүрт миллиард һум инвестиция йәлеп итеүҙе һәм ике меңдән ашыу яңы эш урыны булдырыуҙы (иң элек — энергетика ихтыяждары өсөн машиналар эшләүҙә, шулай уҡ төҙөлөш секторында) күҙ уңында тота^[4][5][6].

«Нефтекама» ТОР-ының потенциаль резиденттарына талаптар, РФ Хөкүмәтенең 2017 йылдың 26 апрелендәге «Рәсәй Федерацияһы Хөкүмәтенең 2015 йылдың 22 июнендәге 614-се ҡарарына үҙгәрештәр индереү тураһында»ғы 494-се Ҡарары менән индерелгән төҙәтмәләргә ярашлы, дәғүә итеүсе компанияларҙың бары тик ҡала биләмәһендә генә эшмәкәрлек алып барырға, беренсе йыл дауамында инвестицияларҙың минималь күләмен 2,5 миллион һумдан (НДС-ты иҫәпкә алмайынса) кәм итмәҫкә, тәүге йылда 10-дан да кәм булмаған яңы эш урындары булдырырға, сит илдәрҙән эшсе көстәрҙе йәлеп итеүҙе иң күбе 25 процент менән сикләргә, ябылыу, бөлгөнлөк йәки үҙгәртеп ҡороу процесында булмаҫҡа һәм ТОР эшмәкәрлегенең йүнәлеш төрҙәренә тап килергә тейешлеген күҙ уңында тота^[7]. Резиденттар өсөн льготалы һалым режимы ҡаралған: табышҡа федераль бюджетҡа күсерелә торған һалым һалынмай, төбәк бюджетына түләнгән аҡса тәүге килем алғандан алып тәүге биш йыл эсендә — 5 проценттан, һуңынан 10 проценттан артмай. Ергә һәм мөлкәткә һалымдар һалынмай, страховка иғәнәләре 7,6 процентҡа тиклем кәмей^[8].

«Нефтекама» ТОР-ының беренсе резиденты 2019 йылдың июнендә «Интеркуб» компанияһы (төҙөлөш металл конструкциялары, изделиелар һәм уларҙың өлөштәрен етештереү) була^[9]. Бер айҙан һуң «Башлайт» компанияһы (электр лампалары һәм яҡтыртыу ҡорамалдары етештереү) биләмә резиденты статусын ала^[10]

2020 йылдың октябрендә хужалыҡ һәм мәҙәни-көнкүреш тәғәйенләнешендәге пластмасса изделиелар етештереү буйынса завод проекты менән «ПК Импульс» компанияһы ТОР резиденты була^[11].

2021 йылдың февралендә ТОСЭР резиденттары реестрына «Каматрон» компанияһы (компрессор ҡорамалдары етештереү) индерелә^[12]. Шул уҡ йылдың июнендә исемлекте «Беренсе мебель компанияһы» (смарт-карауаттар етештереү) тулыландыра^[13]. Августа полимерҙар етештереү проекты (планлаштырылған инвестициялар күләме — 130 миллион һум) менән «Аттика — Өфө» компанияһы резидент булыр теркәлә^[14]. 2021 йылдың сентябрендә «Нефтекама» ТОР-ының тағы бер резиденты, «Рестон» компанияһы (ортопедик карауаттар етештереү) теркәлә. Компания йылдам социаль-иҡтисади үҫеш биләмәһенең 14-се резиденты була, был ваҡытҡа инвестицияларҙың дөйөм күләме миллиард һумға яҡын тәшкил итә, яңы эш урындары һаны — меңдән ашыу^[15].