Башинформ

Агентлыҡ көн һайын мәғлүмәт сығарылыштары әҙерләй һәм уларҙы рус, башҡорт һәм инглиз телдәрендә тарата. Мәғлүмәт продукттары киң мәғлүмәт сараларына, дәүләт һәм йәмәғәт ойошмаларына, шулай уҡ сит ил медиаларына еткерелә. «Башинформ» матбуғат конференциялары, брифингтар һәм журналистар өсөн башҡа саралар ойоштора.

Агентлыҡ федераль һәм халыҡ-ара киң мәғлүмәт саралары менән хеҙмәттәшлек итә, шул иҫәптән РИА Новости һәм Интерфакс. Шулай уҡ Волга буйы һәм Урал төбәктәренең баҫмалары менән эшләй. «Башинформ» «Версия», «Курьер» гәзиттәрен, «Йәмәғәт электрон гәзите» интернет-басмаһын ойоштороусы булып тора.

Өфө полиграфия комбинаты менән берлектә «Версия» китап серияһын сығара^[1].

«Медиалогия» системаһы мәғлүмәттәре буйынса, 2026 йылдың апреленә «Башинформ» мәғлүмәт агентлығы Башҡортостан Республикаһында төбәк киң мәғлүмәт саралары араһында цитаталар рейтингында беренсе урынды биләй^[2]. Яндекс.Метрика мәғлүмәттәре буйынса, 2026 йылдың мартында bashinform.ru сайтына яҡынса 500 мең ҡулланыусы ингән, дөйөм алғанда 1,73 миллион ҡарау булған^[3].

Агентлыҡ акционерҙар йәмғиәте (элек асыҡ акционерҙар йәмғиәте) булараҡ эшләй, уның акцияларының 100% Башҡортостан Республикаһына ҡарай. Ойоштороусы булараҡ төбәктең вәкәләтле башҡарма органы сығыш яһай.

Ведомство эшмәкәрлеге Башҡортостан Республикаһы бюджетынан, шулай уҡ коммерция эшмәкәрлегенән, шул иҫәптән мәғлүмәт хеҙмәттәре күрһәтеүҙән һәм рекламанан килгән килемдәрҙән финанслана.

Ведомство структураһына мөхәрририәт, мультимедиа, тәржемә һәм административ бүлектәр инә.

Агентлыҡ 1992 йылда «Версия» гәзите базаһында Башҡортостан Республикаһының Республика мәғлүмәт-хоҡуҡи агентлығы «Версия» булараҡ ойошторола. Уның барлыҡҡа килеүе дәүләт органдары эшмәкәрлеген киңерәк яҡтыртыу һәм халыҡтың хоҡуҡи мәғлүмәтлелеген арттырыу ихтыяжы менән бәйле була.

Артабан агентлыҡ бер нисә үҙгәртеп ҡороу этабын үтә:

• 1992—1994 — Республика мәғлүмәт-хоҡуҡи агентлығы «Версия»;
• 1994—1995 — дәүләт мәғлүмәт-хоҡуҡи агентлығы «Башинформ»;
• 1995—2002 — дәүләт мәғлүмәт агентлығы «Башинформ»;
• 2002 йылдан — асыҡ акционерҙар йәмғиәте ИА «Башинформ».

Агентлыҡҡа нигеҙ һалыусыларҙың береһе һәм уның тәүге етәксеһе — Виктор Игнатьевич Журавлёв. Ул мәғлүмәт хеҙмәтен ойоштороуҙа һәм агентлыҡты үҫтереүҙә мөһим роль уйнаны^[4].

1990-сы йылдарҙа «Башинформ» төбәктә беренселәрҙән булып мәғлүмәт таратыуҙың заманса технологияларын индерә: факс (рус.)баш. һәм почта аша ебәреүҙән электрон почтаға һәм интернетҡа күсә. 1994 йылдың ноябрендә тәүге тапҡыр мәғлүмәт интернет селтәре аша тапшырыла, ә 1997 йылдың 12 мартында агентлыҡ сайтының домены теркәлә — был Башҡортостандағы тәүге медиаресурстарҙың береһе була^[5][1].

Урынлашыуы

1995—2002 йылдарҙа «Башинформ» мәғлүмәт агентлығы Өфө ҡалаһы, Ғафури урамы, 101 адресы буйынса урынлаша.

2002 йылда «Башинформ» асыҡ акционерҙар йәмғиәтенең директорҙар Советының беренсе рәйесе Илдар Ғимаев башланғысы менән агентлыҡҡа Киров урамы, 45 адресы буйынса элекке «Башфото» — «Нур» тресы бинаһы тапшырыла.

«Башинформ» мәғлүмәт агентлығында — Башҡортостанда матбуғат сараларын үткәреү өсөн ике популяр майҙансыҡ, 30 журналистҡа һәм 4 спикерға иҫәпләнгән конференц-зал һәм 72 урынлыҡ һәм президиумда 4 урынлыҡ конференц-холл бар. Йыл һайын был майҙансыҡтарҙа 150-нән 200-гә тиклем сара үткәрелә^[6].

Агентлыҡтың төп эш йүнәлештәре:

• республикалағы ваҡиғаларҙы оператив яҡтыртыу;
• дәүләт органдары эшмәкәрлеген мәғлүмәт менән тәьмин итеү;
• киң мәғлүмәт саралары өсөн яңылыҡтар таҫмаларын таратыу;
• матбуғат саралары ойоштороу;
• интернет-портал һәм мультимедиа проекттарын үҫтереү^[1].

XXI быуат башында «Башинформ» Башҡортостандың мәғлүмәт ресурстарының береһе булып формалаша. Агентлыҡтың рәсми сайты төбәктәге иң популяр яңылыҡтар порталдарының береһе булып тора, уның айлыҡ аудиторияһы миллиондан ашыу ҡулланыусыны тәшкил итә «Башинформ» бөгөн дә республиканың мәғлүмәт киңлегендә мөһим урын алып, йәмғиәт өсөн әһәмиәтле ваҡиғаларҙы оператив һәм ышаныслы яҡтыртыуын дауам итә^[7].

«Башинформ» мәғлүмәт агентлығы Башҡортостан Республикаһында хөкүмәт органдары эшмәкәрлеге һәм йәмәғәт тормошо тураһында яңылыҡтар мәғлүмәте биреүсе төбәк сығанаҡтарының береһе булып тора.

Академик һәм публицистик әҙәбиәттә дәүләт мәғлүмәт агентлыҡтары шулай уҡ уларҙы хөкүмәт органдары менән үҙ-ара эш итеү һәм мөхәрририәт бойондороҡһоҙлоғо үҙенсәлектәре контексында тикшерелә.