Бикмөхәмәтов Роберт Ғата улы
Бикмөхәмәтов Роберт Ғата улы (11 ғинуар 1929 йыл — 28 август 1995 йыл) — әҙәбиәт белгесе, юғары мәктәп уҡытыусыһы, журналист. Филология фәндәре докторы (1983), профессор (1987). Башҡорт АССР-ының атҡаҙанған фән эшмәкәре (1989).
Биографияһы
Роберт Ғата улы Бикмөхәмәтов 1929 йылдың 11 ғинуарында Башҡорт АССР-ының Бөрө кантоны Илеш ауылында[1] тыуған.
1952 йылда Ҡазан дәүләт университеты тамамлай.
1956 йылдан алып СССР Фәндәр Академияһының М. Горький исемендәге Донъя әҙәбиәте институтында (Мәскәү) эшләй.
1960 йылдан — «Дружба народов» журналы баш мөхәррир урынбаҫары.
1962 йылдан алып — Мәскәү дәүләт университеты уҡытыусыһы, әҙәбиәт тарихы кафедраһының сектор мөдире.
1995 йылда Мәскәүҙә вафат була.
Ғилми эшмәкәрлеге
Фәнни хеҙмәттәре Рәсәй халыҡтары милли әҙәбиәттәренең бер-береһенә йоғонтоһо, әҙәбиәт теорияһы, әҙәбиәт ғилеменең методологияһына арналған. Ғабдулла Туҡай, Ғәлимйән Ибраһимов, Муса Йәлил тормошо һәм ижадына арналған монографиялар; Мәжит Ғафури, Мостай Кәрим, Сәйфи Ҡудаш, Назар Нәжми, Ким Әхмәтйәнов һ. б. ижадына арналған мәҡәләләр авторы. Роберт Бикмөхәмәтов хеҙмәттәре инглиз, немец, поляк телдәренә тәржемә ителгән.
Хеҙмәттәре
- Орбиты взаимодействия. — М., 1983.
Маҡтаулы исемдәре
- Башҡорт АССР-ының атҡаҙанған фән эшмәкәре (1989).
Иҫкәрмәләр
- ↑ 1 2 Хәҙерге Башҡортостан Республикаһының Илеш районы
Сығанаҡтар
Бикмөхәмәтов Роберт Ғата улы // Башҡорт энциклопедияһы. — Өфө: «Башҡорт энциклопедияһы» ғилми-нәшриәт комплексы, 2015—2020. — ISBN 978-5-88185-143-9.