Большаков Станислав Владимирович
| Станислав Владимирович Большаков | |
|---|---|
 | |
| Тыуған көнө | 29 август 1986 |
| Тыуған урыны | |
| Вафат булған көнө | 19 сентябрь 2023 (37 йәш) |
| Хәрби звание | сержант |
| Вазифа | взвод командиры урынбаҫары |
| Хәрби алыш/һуғыштар | |
| Награда һәм премиялар |
 |
Большаков Станислав Владимирович (29 август 1986 йыл — 19 сентябрь 2023 йыл) — Рәсәй Федерацияһы Ҡораллы көстәренең хәрби хеҙмәткәре, гвардия сержанты, Һауа-десант ғәскәрҙәренең 98-се гвардия һауа-десант дивизияһы 217-се гвардия парашют-десант полкы 7-се парашют-десант ротаһының взвод командиры урынбаҫары. Махсус хәрби операцияла ҡатнашыусы. Рәсәй Федерацияһы Геройы (үлгәндән һуң).
Биографияһы
Станисла́в Влади́мирович Большако́в Татар АССР-ының Брежнев (хәҙер — Яр Саллы) ҡалаһында тыуа. 1-8-се синыфта Алабуға ҡалаһында уҡый. Станиславҡа 13 йәш булғанда ғаилә ата-әсәһенең тыуған яғына — Яңауыл районына ҡайта[1]. 8-11-се синыфта егет Башҡортостандың Яңауыл ҡалаһының 3-сө мәктәбендә уҡый[2].
Мәктәпте тамамлағандан һуң Яңауыл районының Прогресс ауылындағы 101-се һөнәрселек училищеһына инә (2003).
2004 йылдан 98-се гвардия һауа-десант дивизияһы 217-се гвардия парашют-десант полкында хеҙмәт итә. Матди тәьминәт ротаһы водителенән алып взвод командиры урынбаҫарына тиклем үрләй.
2014 йылда Рәсәй ғәскәрҙәренең Ҡырым операцияһында, 2021—2022 йылдарҙа Сүриәләге хәрби хәрәкәттәрҙә ҡатнаша.
2022 йылдың 24 февраленән махсус хәрби операцияла ҡатнаша[3].
2023 йылдың 18 сентябрендә хәрби бурысын үтәгәндә һәләк була. 30 сентябрҙә Иваново өлкәһенең Кохма ҡалаһында ерләнә[4].
2024 йылдың 26 февралендә Рәсәй Федерацияһы Президенты Указы менән Станислав Большаковҡа хәрби бурысын үтәгәндә күрһәткән ҡаһарманлығы һәм батырлығы өсөн үлгәндән һуң Рәсәй Федерацияһы Геройы исеме бирелә. 17 апрелдә Иваново өлкәһе губернаторы Станислав Воскресенский уның ғаиләһенә «Алтын Йондоҙ» миҙалын тапшыра[5][6].
Батырлығы
2023 йылдың 18 сентябрендә Станислав Большаковтың төркөмө Донецк Халыҡ Республикаһында дошмандың ике ут нөктәһен, боеприпастар склады итеп йыһазландырылған бункерҙарын, личный составын юҡ итә, ҡоралын ҡулға төшөрә. Гвардия сержанты Большаков дошман утын кире ҡағыу өсөн тотороҡло оборона ойоштора. Дошмандың десантсылар позицияларына контрһөжүме ваҡытында Большаков ҡаты яралана, әммә үҙенең подразделениеһын алышҡа алып барыуын дауам итә. Күпселек подразделениеларға яралыларҙы эвакуациялау өсөн сигенергә бойоролғас, ул өс яугир менән бергә эвакуацияланыусыларҙы ҡаплап тора һәм яралыларҙың ғүмерен ҡотҡара. Әммә үҙе алған яраларынан вафат була[3].
Наградалары
• Рәсәй Федерацияһы Геройы (2024, үлгәндән һуң)
• Ҡаһарманлыҡ ордены (2024, үлгәндән һуң)[7].
Хәтер
• Рәсәй Геройы Станислав Большаков хөрмәтенә Алабуғала, Ивановола иҫтәлекле таҡтаташ ҡуйылған.
• Яңауыл ҡалаһының Р. Гәрәев исемендәге урта дөйөм белем биреү мәктәбендә Герой партаһы, иҫтәлекле таҡтаташ асылған[8].
Иҫкәрмәләр
- ↑ Большаков Станислав Владимирович
- ↑ Выпускнику Янаульской школы Станиславу Большакову, героически погибшему в СВО, присвоено звание Героя России
- ↑ 1 2 Большаков Станислав Владимирович. warheroes.ru. Дата обращения: 4 октябрь 2024.
- ↑ Большаков Станислав Владимирович-Герой РФ. Книга Памяти Ивановской области (3 октябрь 2023). Дата обращения: 4 октябрь 2024.
- ↑ Ивановскому десантнику присвоили звание Героя России посмертно - 168 часов (17.04.2024). 4 октябрь 2024 тикшерелгән.
- ↑ Виктория Гущина. Станислав Воскресенский вручил медаль "Золотая Звезда" семье Героя России сержанта Большакова (17 апреля 2024). 7 октябрь 2024 тикшерелгән.
- ↑ Погиб гвардии сержант Станислав Большаков
- ↑ Герой России Станислав Большаков: на таких людях и держится наша страна