Корнеев Иван Ильич

Корнеев Иван Ильич 1914 йылдың 5 майында Ҡаҙағстан ССР-ы Ҡарағанды өлкәһе Йәштәр районының Бесәнле ауылында (Хәҙерге Ҡаҙағстан Республикаһы Ҡарағанды өлкәһе Осакаровский районы) тыуған. Милләте буйынса урыҫ. Ете синыфты тамамлаған.

1935-1936 йылдарҙа Башҡорт АССР-ы Ейәнсура районының «Һаҡмар» совхозында эшләй.

Ҡыҙыл Армияға 1936 йылда Ейәнсура районы хәрби комиссариатынан саҡырала. 1936-1939 йылдарҙа Алыҫ Көнсығышта һәм Монголия Халыҡ Республикаһында хеҙмәт итә.

Бөйөк Ватан һуғышына 1941 йылдың июлендә Ҡаҙағстандың Джамбул өлкәһенең Чуй район хәрби комиссариатынан алына. Сталинград, Көньяҡ-Көнбайыш, Дала, Үҙәк, Белоруссия һәм 1-се Белоруссия фронттарында һуғыша.

1945 йылдың ғинуар айындағы батырлығы өсөн «Советтар Союзы Геройы» исеме 1945 йылдың 27 февралендә бирелә.

1945 йылдың 15 ғинуарында Пабьяница ҡалаһы (Польша) районында фашист төркөмө менән ҡаты алыш бара. Гитлерсылар ҡамауға эләккән урындан ҡотолорға тырышып, беҙҙең позицияларҙы өҙлөкһөҙ һөжүм итә. Гвардия сержанты И.И. Корнеевтың яҡшы маскировкаланған орудиеһы урынлашҡан позицияға табан 5 дошман танкы килә (147-се гвардия артиллерия полкы, 15-се гвардия кавалерия дивизияһы, 7-се гвардия кавалерия корпусы, 1-се Белорус фронты). Һөжүмде кире ҡағып, ул ике танкты яндыра, ә ҡалғандарын кире боролорға мәжбүр була. Дошман автоматсылары һөжүмгә ташлана. И.И. Корнеев уларға шрапнель менән ата. Юғалтыуҙарға ҡарамаҫтан, дошман һөжүмде дауам итә. И.И. Корнеев фашистарҙы гранаталар һәм автоматтан ҡыра. Шулай итеп ул үҙенә ярҙам килгәнсе фашистарға ҡамауҙан сығырға бирмәй.

1945 йылда Иван Корнеев Мәскәүҙә Еңеү парадында ҡатнаша.

Һуғыштан һуң Корнеев Һамар өлкәһенең Жигулевск ҡалаһында йәшәй, Һуңынан Ырымбурға күсә[1].

1989 йылдың 14 июнендә Ырымбур ҡалаһында вафат була.

• Советтар Союзы Геройының «Алтын Йондоҙ» миҙалы (№ 5219) (27.02.1945);
• Ленин ордены (27.02.1945);
• Ҡыҙыл Байраҡ ордены;
• ике I дәрәжә Ватан һуғышы ордены;
• II дәрәжә Ватан һуғышы ордены;
• Ҡыҙыл Йондоҙ ордены;
• СССР миҙалдары.