Ҡолошев Урал Фәләх улы

Ҡолошев Урал Фәләх улы 1965 йылдың 1 майында Силәбе өлкәһе Сосновка районының Ҡалды күле буйында урынлашҡан башҡорт ауылы Оло Тәгештә тыуған.

Фәләх Садир улы менән Өммәй Зыя ҡыҙы Ҡолошевтарҙың һигеҙ балалы ғаиләһендә иң кесеһе була. 1982 йылда урта мәктәпте, ә 1984 йылда бишле билдәләренә генә СПТУ-73-сө рәссам-декоратор бүлеген тамамлай. Хәрби хеҙмәтте Хабаровск крайында Байкало-Амур магистрале төҙөлөшөндә үтә, «За строительство БАМ» миҙалы менән бүләкләнә^[1].

1986 йылда Урал Силәбе мәҙәниәт һәм сәнғәт институтына «Халыҡ ижады буйынса методист» һөнәре буйынса уҡырға инә^[2]. Студент йылдарында уҡ шиғырҙар яҙа башлай; уның беренсе әҫәрҙәре «Кадры культуры» исемле институт гәзитендә баҫылып сыға, ә йәш шағир гәзиттә рәссам булып та эшләй.

1990 йылда Урал Ҡолошев Сосновка районының Долгодеревенское ауылында балалар сәнғәт мәктәбенең художество бүлегендә уҡытыусы булып эшләй башлай һәм әлеге көндә лә шунда эшләй^[3]. Урал Ҡолошевтың уҡыусылары район һәм өлкә күләмендә һынлы сәнғәт күргәҙмәләрендә ҡатнашалар һәм абруйлы конкурстарҙың еңеүселәре булалар. Егерменән артыҡ уҡыусыһын сәнғәт буйынса уҡыу йорттарына инергә әҙерләй. Наталья Веденеева, Наталья Полушкина, Елена Софьина, Оксана Тягунова, Вадим Чекутов һәм башҡа уҡыусылары үҙҙәренең ғүмерен һынлы сәнғәт менән бәйләйҙәр.

1997 йылда Урал Ҡолошев Бабич исемендәге татар-башҡорт китапханаһы янындағы Аҡмулла исемендәге Әҙәби берекмә составына инә. Ә 1998 йылда үҙе Долгодеревенское ауылы Үҙәк китапханаһы янындағы «У камина» әҙәби берекмәһен етәкләй^[4]. Ошо ваҡыттан алып Ҡолошевтың әүҙем ижади тормошо башлана.

2001 йылда Силәбелә әҙәби берекмә ағзаларының шул уҡ «У камина» исеме аҫтында шиғырҙар йыйынтығы баҫылып сыға^[4]. Шағирҙың ете автор йыйынтығы, шулай уҡ әҙәби берекмә ағзаларының алты коллектив йыйынтығы баҫылып сыҡҡан. «Второе дыхание» шиғырҙар йыйынтығы һәм «Тырыш һәм Алдай» әкиәте баҫтырып сығарыуға әҙерләнә. Ул егерменән артыҡ мәҫәл авторы; уларҙың ҡайһы берҙәре «КИТАП» нәшриәте сығарған «Балалар әҙәбиәте антологияһы» өс томлығына ингән. Яҙыусының күпселек әҫәрҙәре ике телдә: урыҫ һәм башҡорт телдәрендә баҫылған. Татар теленә тәржемәләре бар.

Урал Ҡолошев әҫәрҙәрендә тормош мәғәнәһе, изгелек һәм яуызлыҡ, ысын һәм ялған ҡиммәттәр кеүек мәңгелек темаларға мөрәжәғәт итә. Ижадының тағы бер йүнәлеше — башҡорт халыҡ йырҙары; үҙаллы гитарала һәм гармунда уйнарға өйрәнә, «Айгөл» һәм «Дуҫлыҡ» ансамблдәре менән сығыш яһай, егерменән артыҡ йыр яҙа һәм ике музыкаль йыйынтыҡ баҫтырып сығара^[4].

2021 йылдан Урал Ҡолошев етәкселегендә «Сосновская нива» гәзитендә «Салям» даими бите сыға^[5].

Әҙәби берекмә ағзаларының коллектив әҫәрҙәр йыйынтыҡтары:

• Авторҙар коллективы. «У камина». — Силәбе, 2001.,
• Авторҙар коллективы. «Души крупицы». — Силәбе, 2010.,
• Авторҙар коллективы. «Радуга». — Силәбе, 2010.,
• Авторҙар коллективы. «С любовью к жизни». — Силәбе, 2014.,
• Авторҙар коллективы. «Жизнь — полёт». — Силәбе, 2016.,
• Авторҙар коллективы. «Живёт деревенька». — Силәбе, 2018.^[5].

Урал Ҡолошевтың үҙенең әҫәрҙәренең йыйынтыҡтары:

• Урал Ҡолошев. «Рәхмәтлелек көсө» (башҡорт телендә). — Өфө, 2006.,
• Урал Ҡолошев. «Мыслью доброю о вечном» (урыҫ һәм башҡорт телдәрендә). — Силәбе, 2006.,
• Урал Ҡолошев. «Брызги солнечных лучей» (музыкаль әҫәрҙәр). — Силәбе, 2011.,
• Урал Ҡолошев. «Тепло души» (урыҫ телендә). — Силәбе, 2015.,
• Урал Ҡолошев. «Огонь любви и откровений». — Силәбе, 2015.,
• Урал Ҡолошев. «Расцвела в саду сирень». — Силәбе, 2015.,
• Урал Ҡолошев. «Күңел йылыһы» (башҡорт телендә). — Өфө, 2019..^[6]

Уның әҫәрҙәре өлкәнең, Башҡортостан һәм Татарстан республикаларының ваҡытлы баҫмаларында баҫылып сығалар, шулай уҡ «Силәбе шишмәләре» әҙәби антологияһына (Силәбе, 2002), «Мелодии Челябинска» (Ҡаҙан, 2007), "Силәбе башҡорттарының әҙәби антологияһы"на (Өфө, 2011), «В юрте дружбы» (Ҡаҙан, 2012), «Поэтическая перекличка» (Силәбе, 2015) инә.^[4]

• «За строительство БАМ» миҙалы (1980-е йылдар);
• Ғәлимов Сәләм исемендәге район әҙәби премия лауреаты, «Нәфис әҙәбиәт» номинацияһы (2011).^[4];
• Силәбе өлкәһе Губернаторы һәм мәҙәниәт министрлығының Маҡтау ҡағыҙы (2012);
• Силәбе өлкәһе һәм Башҡортостан Республикаһы араһында төбәк-ара бәйләнеште нығытыуға ҙур өлөш индергәне һәм «Рәсәй Федерацияһы башҡорттары» программаһын тормошҡа ашырыуҙа әүҙем ҡатнашҡаны өсөн Почёт грамотаһы (2012).^[6]
• Силәбе өлкәһе Закондар сығарыу Йыйылышының Рәхмәт хаты (2013)^[6];
• Всемирный курултай (съезд) башкир медале — «башҡорт халҡын консолидациялау, милли мәҙәниәтте, телде һәм рухилыҡты һаҡлау һәм үҫтереү буйынса әүҙем, емешле һәм күп йыллыҡ эше өсөн» (2022)^[5];
• 2022 йылда педагогик оҫталыҡ «Вдохновение» конкурс-фестивале еңеүсеһе, «Литера Артель» өлкә әҙәби конкурсы һәм «Мой Южный Урал: легенды и предания» («Край Ра» нәшриәте) конкурсы лауреаты^[5].