Бохараев Ғәлләнур Мостафа улы

Ғәлләнур Мостафа улы Бохараев 1915 йылда Өфө губернаһының Миәкә ауылында тыуа. Ҡазанда финанс хеҙмәткәрҙәре курстарын тамамлағандан һуң Миәкә Дәүләт банкыһында бухгалтер булып эшләй.

1940 йылда Ҡыҙыл Армия сафына саҡырыла һәм унда полк мәктәбен тамамлай. Ғәлләнур Бохараев өсөн һуғыш ул взвод командиры булып хеҙмәт иткән Даугавпилс ҡалаһында башлана. Алыштар ваҡытында ҡамауға һәм әсирлеккә эләгә. Әсирлектә үҙен Сәлим Бохаров тип атай. «Иҙел-Урал» легионында уны ошо исем менән беләләр. 827-се батальондың 4-се ротаһының взвод командиры була. Легиондың Ғайнан Ҡормашев менән Муса Йәлил етәкселегендәге йәшерен ойошмаһына инеп, 827-се батальонда әүҙем антифашистик эш алып бара, уны совет ғәскәрҙәре яғына алып сығыуға әҙерләй. Йәшерен ойошма етәкселеге менән бәйләнеште Фуат Сәйфелмөлөков аша тота. Йәшерен ойошманың башҡа ағзалары менән бергә фаш ителә, ауыр язаға думар була һәм йәлилселәрҙең иң һуңғыһы булып 1944 йылдың 25 авгусында көндөҙгө 1-се 36 минутта язалана.

Уны ҡулға алғандан һуң да немецтар батальон частарын партизандарға ҡаршы һуғышҡа алып барырға йөрьәт итмәй. Батальондың ҡалған өлөшө ҡоралһыҙландырыла һәм Францияға оҙатыла. Унда легионерҙарҙың күптәре макиҙар — француз партизандары яғына сыға.

• Башҡа йәлилселәр менән бергә 1990 йылдың 5 майында, СССР Президенты М. С. Горбачёвтың Указы менән «йәшерен антифашистик төркөмдә әүҙем илһөйәрлек эшмәкәрлеге һәм ныҡлыҡ, ҡаһарманлыҡ өсөн» ҡормашевсылар үлгәндән һуң I дәрәжә Ватан һуғышы ордены менән наградланғандан һуң аҡлана^[2].
• Сәлим Бохаровтың исеме Ҡазандағы Муса Йәлил һәйкәле эргәһендәге подпольщиктар исеме менән бер рәттән барельефҡа уйып яҙылған^[3].