Рус телендәге версияМахсус проекттар
Телде алмаштырырға
РУВИКИ ТУРАҺЫНДА

Ураҙғолов Рәлис Ришат улы

Рәлис Ришат улы Ураҙғолов (рус. Ралис Ришатович Уразгулов; 1965 йылдың 10 ғинуары, Иҫке Муса ауылы, Башҡорт АССР-ы — 2024 йылдың 24 декабре, Иҫке Муса ауылы, Башҡортостан Республикаhы) — Рәсәй журналисы, яҙыусы. 2007—2024 йылдарҙа «Башҡортостан» гәзите хеҙмәткәре. Рәсәйҙең һәм Башҡортостан Республикаһының Журналистар (1993) һәм Яҙыусылар (2002) союздары ағзаһы. Башҡортостан Республикаһының атҡаҙанған мәҙәниәт хеҙмәткәре (2015) һәм Шәһит Хоҙайбирҙин исемендәге премияһы лауреаты (1995).

Биографияһы

Рәлис Ришат улы Ураҙғолов 1965 йылдың 10 ғинуарында Башҡорт АССР-ының (хәҙер Башҡортостан Республикаһы)Ҡырмыҫҡалы районы Иҫке Муса ауылында тыуған[1].

Юғары белемле: 1996 йылда Башҡорт дәүләт университетының башҡорт филологияһы һәм журналистика факультетын тамамлаған.

  • 1983—1985 йылдар — Совет Армияһы сафтарында хеҙмәт итеү.
  • 1985—1987 йылдар — Иҫке Муса ауыл мәҙәниәт йорто директоры.
  • 1992—1993 йылдар — «Хеҙмәт даны» Ҡырмыҫҡалы район гәзитендә хәбәрсе, бүлек мөдире.
  • 1993—2000 йылдар — «Йәшлек» гәзитендә хәбәрсе, бүлек мөдире.
  • 2000—2006 йылдар — «Башҡортостан» гәзите хәбәрсеһе.
  • 2006—2007 йылдар — «Ағиҙел» журналының публицистика бүлеге редакторы.
  • 2007—2024 йылдар — «Башҡортостан» гәзите хәбәрсеһе.

Журналист һәм әҙип 2024 йылдың 24 декабрендә вафат була[2].

Ижады

Республиканың төп ижтимағи-сәйәси гәзите «Башҡортостан» хеҙмәткәре булараҡ иҡтисад, ауыл хужалығы, экология һәм башҡа халыҡты борсоған темаларға яҙа. Журналист һәм яҙыусы Рәлис Ураҙғолов матбуғаттағы көндәлек хеҙмәте менән бер рәттән проза әҫәрҙәре өҫтөндә лә эшләй.

Йыйылған тормош тәжрибәһе һәм бай материалдары Рәлис Ураҙғоловты әҙәби ижадҡа алып килә. Уның «Тамуҡ юлы» исемле тәүге хикәйәһе 2000 йылда нәшер ителгән «Ярҙағы таштар» коллектив йыйынтыҡта донъя күрә. Ә 2004 йылда йәш яҙыусы «Бормалы яҙмыштар» тип аталған үҙенең хикәйәләр йыйынтығын сығара. 2008 йылда баҫылған «Аслыҡ» романы — әҙиптең ҙур күләмле тәүге әҫәре.

Әҫәрҙәре

  • Тамуҡ юлы: Хикәйә. — «Ярҙағы таштар» (коллектив йыйынтыҡ). — Өфө: Китап, 2000. — бит.
  • Бормалы яҙмыштар: Хикәйәләр. — Өфө: Китап, 2004. — бит.
  • Аслыҡ: Роман. — Өфө: Китап, 2008. — бит.
  • Эй ғүмер юлдары... : повесть, хикәйәләр. Өфө, 2015.

Ижадына баһа

Гәзит-журнал биттәрендә баҫылған ижад емеше тураһында тәнҡитселәр һәм әҙәбиәт белгестәре тарафынан ыңғай фекер әйтелгән. Мәҫәлән, башҡорт тел белгесе, филология фәндәре докторы Ғәли Сәйетбатталов әҙиптең һүҙ оҫтаһы булыуын билдәләй һәм «Рəлис Ураҙғоловтың əҫəрҙəре башҡорт әҙәбиәтен, публицистикаһын һəм əҙəби телебеҙҙе артабан үҫтереүҙә ҙур роль уйнай» тип яҙа[3].

Журналист республика һәм илебеҙ йәштәренең көнүҙәк проблемалары һүрәтләгән һәм «Йәшлек» гәзитендә баҫылған публицистик материалдары һәм очерктары өсөн 1995 йылда Башҡортостан Журналистар союзының Шәһит Хоҙайбирҙин исемендәге премияһына лайыҡ була.

2015 йылда уға «Башҡортостан Республикаһының атҡаҙанған мәҙәниәт хеҙмәткәре» тигән исем бирелә[1].

Әҙип һәм уның әҫәрҙәре хаҡында

Маҡтаулы исемдәре һәм башҡа бүләктәре

  • Шәһит Хоҙайбирҙин исемендәге премия (1995).
  • Башҡортостан Республикаһының атҡаҙанған мәҙәниәт хеҙмәткәре (2015).

Хәтер

  • 2025 йылдың мартында «Йәшлек» гәзите редакцияһы Ураҙғоловтар ғаиләһе менән берлектә хикәйәләр конкурсы иғлан итә. Әҙәби бәйгегә ирекле темаға яҙылған күләме 15 биттән артмаған (А4 форматында 14-се шрифт) проза әҫәрҙәре ҡабул ителә. Авторҙарға йәш буйынса сикләүҙәр юҡ, уларҙың Яһыусылар союзы ағзаһы булыу-булмауы иҫәпкә алынмай. Конкурс 2026 йылдың 1 апреленән 2027 йылдың 1 ноябренә тиклем дауам итә. Хикәйәләр гәзиттә псевдоним менән баҫыла, уларға гонорар түләнмәй. Әҙәби бәйгелә 50 мең һум аҡсалата төп бүләк һәм биш дәртләндереү номинацияһы ҡаралған[4].

Иҫкәрмәләр

  1. ↑ 1 2 Уразгулов Ралис Ришатович. Региональный интерактивный энциклопедический портал «Башкортостан» (17 октябрь 2019). Мөрәжәғәт итеү датаһы: 24 март 2026. (рус.)
  2. ↑ В Башкирии умер писатель и журналист Ралис Уразгулов. ИА «Башинформ», 24 декабря 2024 года (рус.) (Тикшерелеү көнө: 24 декабрь 2024)
  3. ↑ Ғ. Ғ. Сәйетбатталов. Башҡорт теле. 9 том, 290—296 биттәр. Мөрәжәғәт итеү датаһы: 24 март 2026.
  4. ↑ Өр-яңы әҙәби конкурс! Еңеүсегә — 50 мең һум! «Йәшлек» гәзитенең рәсми сайты (25 март 2026). Мөрәжәғәт итеү датаһы: 27 март 2026. (баш.)

Әҙәбиәт

  • Р. Н. Баимов, Г. Н. Гареева, Р. Х. Тимергалина. Писатели земли башкирской. — Уфа: Китап, 2006. — С. 387. — 496 с. — ISBN 978-5-295-03766-5. (рус.) (Тикшерелеү көнө: 24 март 2026);
  • Р. Н. Баимов, Г. Н. Гареева, Р. Х. Тимергалина. Писатели земли башкирской. — Уфа: Китап, 2015. — С. 530, 531. — 496 с. — ISBN ISBN 978-5-295-06338-1. (рус.) (Тикшерелеү көнө: 24 март 2026);

Һылтанмалар

Категориялар