Рәсәй Фәндәр академияһы Өфө ғилми үҙәгенең ғилми китапханаһы

СССР Министрҙар Советының 1951 йылдың 12 майындағы 1591-се ҡарары менән СССР Фәндәр академияһының Башҡортостан филиалы ойошторола, ә 1951 йылдың 18 сентябрендә Мәжит Ғафури исемендәге Башҡортостан тарих, тел һәм әҙәбиәт ғилми-тикшеренеү институты һәм Башҡортостан ботаника баҡсаһы китапханалары нигеҙендә китапхана үҙе булдырыла^[8]. Беренсе мөдире Рабиға Хөсәйен ҡыҙы Ғайсина була.

1951 йылдан 1956 йылға тиклем китапхана элекке Мәжит Ғафури исемендәге Башҡортостан тарих, тел һәм әҙәбиәт ғилми-тикшеренеү институтының (12280 баҫма), элекке Башҡортостан коммунистик ауыл хужалығы мәктәбенең (1500 баҫма), БАССР Ауыл хужалығы министрлығының Башҡортостан ботаника баҡсаһынан (1959 баҫма) китапхана фондын ҡабул итә.

1952 йылда китапхана ҡарамағына беренсе бина — Совет урамы, 13/15 адресы буйынса урынлашҡан торлаҡ йорттоң аҫҡы ҡаты тапшырыла.

1953 йылда Фәндәр академияһы китапханаһынан 12000-гә яҡын китап һәм журнал ҡабул ителә.

1956 йылдан китапханаға Клавдия Николаевна Щербакова етәкселек итә.

1957 йылда 10 урынлыҡ беренсе уҡыу залы асыла. Уҡыу залында шунда уҡ 824 китап һәм журналдан торған ирекле уҡыу фонды булдырыла.

1958 йылда китапхана мөдире вазифаһына Ольга Ефимовна Белобородова тәғәйенләнә. Китапхана ул ваҡыттағы заманса техника менән йыһазландырыла: күбәйтеү аппаратураһы, уҡыу өсөн ҡулайламалар — микрофишалар, микрофильмдар уҡыу өсөн аппараттар, китапхана-ара абонемент эше өсөн телетайп.

1964 йылда китапханаға мосолмандарҙың Диниә назаратынан ғәрәп графикаһында ҡулъяҙма һәм иҫке баҫма китаптарының 646 данаһы тапшырыла^[9].

1964 йылдан 1967 йылдың сентябренә тиклем, Башҡортостан филиалы ябылғандан һуң, китапхана СССР Фәндәр академияһы системаһында Өфө тарих, тел һәм әҙәбиәт институтының комплекслы ғилми китапханаһы булараҡ һаҡланып ҡала.

1969 йылда китапхана Ленин урамы, 62 адресы буйынса яңы бинаға күсә. Был ваҡытҡа уның ике филиалы була.

1970 йылда китапхана, Бөтә Союз китапханалар смотрында еңеүсе булараҡ, III дәрәжә Диплом менән бүләкләнә.

1977 йылда, Рәсәй Фәндәр академияһының тәбиғәт фәндәре буйынса комиссияһы эше йомғаҡтары буйынса, китапхана I дәрәжә «Иң яҡшы ғилми эш өсөн» дипломы менән бүләкләнә.

1980 йылда китапхана Октябрь проспекты, 71 адресы буйынса махсус төҙөлгән яңы бинаға күсә. Был ваҡытҡа фонд күләме 550 мең баҫмаға етә.

1988 йылда китапхана директоры итеп Вера Александровна Сидорова тәғәйенләнә, ул китапхананы 1997 йылға тиклем етәкләй.

2013 йылда китапхана 220-нән ашыу төрҙәге ваҡытлы баҫма ала. Яңы әҙәбиәттең йыллыҡ күләме 3428 дана тәшкил итә.

2014 йылда китапхана директоры итеп Рәмилә Йомаҙил ҡыҙы Сибәғәтова тәғәйенләнә.

Әлеге ваҡытта китапхана штатында 18 хеҙмәткәр иҫәпләнә, шул иҫәптән китап төпләүсе лә. Китапханала бөтә технологик китапхана-библиография процестары сылбырын дүрт сектор тормошҡа ашыра^[10]: һирәк китаптар секторы; әҙәбиәтте туплау, иҫәпкә алыу һәм эшкәртеү секторы; уҡыусыларҙы хеҙмәтләндереү секторы; мәғлүмәт-библиография секторы.

1-се филиал Биология институтын, Биохимия һәм генетика институтын, Ботаника баҡса-институтын һәм Органик химия институтын хеҙмәтләндерә. Уның фонды яҡынса 150 мең дана тәшкил итә. 2-се филиал Математика институтында урынлашҡан, уның фондында 60 мең данаға яҡын баҫма иҫәпләнә. Геология институтында уҡыусыларға уңайлы булһын өсөн иң күп ихтыяж булған әҙәбиәттең 400 данаһы күсереп йөрөтөлөүе ойошторолған.

70 урынлыҡ өс уҡыу залы бар^[3].