Абдрахманов Ғәйнетдин Шәйхи улы

1932 йылдың 9 майында^[2] (башҡа мәғлүмәттәр буйынса — 1929 йылдың 1 майында^[3]) Башҡорт АССР-ының Шишмә районы Уптино (хәҙер — Яңы Опто) ауылында крәҫтиән ғаиләһендә тыуған. Милләте — башҡорт^[2].

Белеме — тулы булмаған урта. Хеҙмәт эшмәкәрлеген 1949 йылдың июнендә Шишмә районы Яңы Троицк машина-трактор станцияһында комбайнсы булып башлай. 1951 йылдың октябрендә Совет Армияһы сафына алына. Демобилизациянан һуң, 1956 йылдың ғинуарынан, Свердловск ҡалаһындағы «Уралэнергоремонт» тресында слесарь булып эшләй. 1958 йылдың авгусынан «Башҡортостанэнерго» производство ремонт предприятиеһында турбина ҡорамалдарын ремонтлау слесары булып хеҙмәт итә^[2].

Турбинасы-ремонтсының ҡатмарлы һөнәрен үҙләштереп, Ғ. Ш. Абдрахманов эштә даими юғары күрһәткестәргә өлгәшә. 1977, 1978, 1979 йылдарҙағы эш йомғаҡтары буйынса уның бригадаһы СССР Энергетика һәм электрификация министрлығы буйынса иң яҡшы тип таныла, йылылыҡ электр үҙәктәренең турбоагрегаттарын капиталь ремонтлауҙа бригада подрядын индереү инициаторы булып сығыш яһай. Бригада подрядын ҡулланыу менән хеҙмәт етештереүсәнлеге бер ярым тапҡырға арта^[2].

Унынсы биш йыллыҡ (1976–1980) осоронда бригада электр станцияларының 30 турбогенераторын капиталь, 25 уртаса һәм ағымдағы ремонт үткәрә. Камилыраҡ технология, алдынғы хеҙмәт ысулдарын һәм уны ойоштороуҙы ҡулланыу арҡаһында бригада турбиналарҙы ремонтлағанда эшсе ваҡытты уртаса бер агрегатҡа 156 сәғәткә ҡыҫҡарта, турбогенераторҙарҙың ремонт араһы осорон 1,5–2 йылға оҙайта^[3]. Коллективтың тик ТЭЦ-1-ҙә башҡарған эше йылына 54,6 миллион киловатт-сәғәт электр энергияһын өҫтәмә етештерергә мөмкинлек бирә^[2].

Бригадир һәм йәштәр остазы булараҡ, Ғ. Ш. Абдрахманов үҙенең ҡарамағындағыларға һәм бригада ағзаларына йөкмәтелгән эш өсөн яуаплылыҡ тойғоһо тәрбиәләүгә, тупланған производство тәжрибәһен тапшырыуға ҙур иғтибар бүлә, йыл һайын ике-өс йәш эшсегә шефлыҡ итә^[2].

Унынсы биш йыллыҡ заданиеларын һәм социалистик йөкләмәләрен үтәүҙә ҙур производство уңыштары өсөн, күрһәткән хеҙмәт батырлығы өсөн СССР Юғары Советы Президиумының 1981 йылдың 31 мартындағы Указы менән Ғ. Ш. Абдрахмановҡа Ленин ордены һәм «Ураҡ һәм Сүкеш» алтын миҙалы тапшырылып, Социалистик Хеҙмәт Геройы исеме бирелә^[2].

1992 йылдан — пенсионер. Өфө ҡалаһында йәшәй. 2001 йылдың 13 апрелендә вафат була^[2][3].

Ғаилә һөнәрен Ғәйнетдин Шәйхи улының улы — Ринат Ғәйнетдин улы дауам итә, Урал төбәгендәге иң ҙур махсус ремонт предприятиеларының береһе — «КВАРЦ Групп» ЯСЙ-һының Өфө филиалы директоры булып эшләй.

• Социалистик Хеҙмәт Геройы (1981)^[2];
• ике Ленин ордены (1974, 1981)^[3];
• Хеҙмәт Ҡыҙыл Байраҡ ордены (1971)^[3].