Байтурина Вазифа Хәмит ҡыҙы
| Тыуған көнө | 25 ғинуар 1939[1] |
|---|---|
| Заты | ҡатын-ҡыҙ |
| Маҡтаулы исемдәре һәм башҡа бүләктәре |
  |
| Вафат булған көнө | 21 апрель 2005[1] (66 йәш) |
| Һөнәр төрө | уҡытыусы |
| Тыуған урыны | |
| Сәйәси фирҡә ағзаһы |
Байтурина Вазифа Хәмит ҡыҙы (25 ғинуар 1939 йыл — 21 апрель 2005 йыл) — педагог, мәғариф, комсомол, партия һәм дәүләт органдары хеҙмәткәре, йәмәғәтсе. 1982—1990 йылдарҙа Башҡорт АССР-ы Министрҙар Советы Рәйесе урынбаҫары. Ике Хеҙмәт Ҡыҙыл Байраҡ (1981, 1986) һәм «Почёт Билдәһе» (1976) ордендары кавалеры.
Биографияһы
Вазифа Хәмит ҡыҙы Байтурина 1939 йылдың 25 ғинуарында Башҡорт АССР-ының Баймаҡ районы Ольховка ауылында тыуған. Күп балалы ғаиләлә Вазифа — иң кесеһе, йәғни унынсыһы, була[2]. Әсәһе ауылда абруйлы кешеләрҙән һанала, ауыл Советына ла һайлана[2]. Старатель булып эшләгән атаһы, ҡыҙ беренсе класта уҡый башлағас, вафат булып ҡала. Рудник ҡасабаһының Ольховка ауылында дүрт класс тамамлағандан һуң, Баймаҡта урта белем ала.
Стәрлетамаҡ дәүләт педагогия институтын (1962), ВЛКСМ-дың Үҙәк Комитеты ҡарамағындағы Юғары комсомол мәктәбен (1966), Свердловск партия мәктәбен (1971) тамамлай[3].
1962—1965 йылдарҙа Башҡорт АССР-ының Баймаҡ районы Йылайыр урта мәктәп-интернатында урыҫ теле һәм әҙәбиәте уҡытыусыһы булып эшләй. 1965 йылда ВЛКСМ-дың Баймаҡ райкомына секретарь вазифаһына тәҡдим ителә. Ике йылдан Өфөгә, ВЛКСМ-дың Башҡортостан өлкә комитетының бүлек мөдире урынбаҫары итеп үрләтелә (1966—1971). 1971—1976 йылдарҙа — ВЛКСМ-дың Башҡортостан өлкә комитеты секретары. Артабан партия органдарында эшләй: 1976—1977 йылдарҙа — КПСС-тың Өфө ҡала комитетының пропаганда һәм агитация бүлеге мөдире, 1977—1982 йылдарҙа — КПСС-тың Өфө ҡала комитеты секретары. 1977 йылдан алып РСФСР-ҙың «Белем» йәмғиәтенең Башҡортостан республика ойошмаһы идараһеның президиумы ағзаһы (1985 йылға тиклем), 1980—1985 йылдарҙа — Башҡорт АССР-ының X саҡырылыш Юғары Советы депутаты. 1982 йылдан 1990 йылға тиклем — Башҡорт АССР-ының Министрҙар Советы рәйесенең урынбаҫары. 1985—1990 йылдарҙа — Башҡорт АССР-ының XI саҡырылыш Юғары Советы депутаты. 1990—1997 йылдарҙа — Башҡортостан Республикаһының Дәүләт йыйылышы — Ҡоролтай секретариатында ойоштороу бүлеге мөдиренең урынбаҫары[3].
Бер нисә йыл Башҡортостан Республикаһының Ҡатын-ҡыҙҙар союзы идараһы ағзаһы була.
Вазифа Хәмит ҡыҙы Байтурина 2005 йылдың 21 апрелендә вафат була[4].
Маҡтаулы исемдәре һәм башҡа бүләктәре
- Ике Хеҙмәт Ҡыҙыл Байраҡ ордены (1981, 1986)
- «Почёт Билдәһе» ордены (1976)
- Башҡорт АССР-ы Юғары Советы Президиумының Почёт грамотаһы (1989)
- Башҡортостан Республикаһының Почёт грамотаһы (1994)
Иҫкәрмәләр
- ↑ 1 2 3 Башкирская энциклопедия (урыҫ) — Башкирская энциклопедия, 2005. — 4344 с. — ISBN 978-5-88185-053-1
- ↑ 1 2 Вазифа Байтурина никогда не сидела без дел…(недоступная ссылка)
- ↑ 1 2 http://urgaza.ru/persons/171/1398/Байтурина(недоступная ссылка) Вазифа Хамитовна
- ↑ БАЙТУРИНА — ВИДНЫЙ ГОСУДАРСТВЕННЫЙ ДЕЯТЕЛЬ НАШЕЙ РЕСПУБЛИКИ
Һылтанмалар
- Региональный интерактивный энциклопедический портал «Башкортостан». Башкирский комсомол. Персоналии: Байтурина Вазифа Хамитовна (рус.) (Тикшерелеү көнө: 24 ғинуар 2024)