Ғәбитов Илдар Миҙхәт улы
Илдар Миҙхәт улы Ғәбитов (рус. Габитов, Ильдар Мидхатович; 1961 йылдың 12 июне, Буранғол, Башҡорт АССР-ы — 2025 йылдың 8 ғинуары, Өфө) — иҡтисад фәндәре кандидаты, доцент, публицист, йәмәғәт эшмәкәре, журналист. Рәсәй һәм Башҡортостан журналистар союзы ағзаһы. Ғилми һәм публицистик хеҙмәттәре, шулай уҡ башҡорт телендәге кроссвордтар һәм сканвордтар авторы булараҡ киң танылыу алған.
Биографияһы
Илдар Миҙхәт улы Ғәбитов 1961 йылдың 12 июнендә Башҡорт АССР-ының Әбйәлил районы Буранғол ауылында күп балалы ғаиләлә тыуған. Уның әсәһе Мәүҙиға Ғаффан ҡыҙы СССР Юғары Советы депутаты һәм әүҙем йәмәғәт эшмәкәре булған.
Урта мәктәпте тамамлағандан һуң Ростов дәүләт университеты иҡтисад факультетында белем ала. Юғары уҡыу йортон тамамлағас, фәнни-педагогик эшмәкәрлеккә тотона.
1983—1990 йылдарҙа Өфө авиация институтында (хәҙерге Өфө дәүләт авиация техник университеты) уҡыта.
1990—1997 йылдарҙа Өфө юридик институтында доцент вазифаһында эшләй.
1997—2004 йылдарҙа Башҡортостан Республикаһы Президенты Хакимиәтенең Баш мәғлүмәт-аналитика идаралығында иҡтисад бүлеге мөдире урынбаҫары һәм мөдире булып эшләй[1].
2004 йылдан алып Башҡорт дәүләт университетында (хәҙерге Өфө фән һәм технологиялар университеты) уҡыта, Финанстар институтында фәнни-педагогик эшмәкәрлек алып бара.
2025 йылдың ғинуарында вафат була[2].
Ғилми һәм ижади эшмәкәрлеге
Илдар Ғәбитов — 80-дән ашыу ғилми хеҙмәт, күп һанлы публицистик мәҡәләләр авторы. Уның яҙмалары иҡтисад, йәмғиәт, әхлаҡи-этик мәсьәләләргә арналды.
Республика матбуғаты уҡыусыларына ул айырыуса башҡорт телендәге кроссвордтар, сканвордтар һәм төрлө башватҡыстар (рус.)баш. авторы булараҡ билдәле. Уның интеллектуаль уйындары республикалағы ваҡиғаларға һәм билдәле шәхестәргә арналған йөкмәткеле һорауҙары менән айырылып торҙо. Милли баҫмаларҙа баҫылған был эштәре уҡыусылар араһында ҙур популярлыҡ яуланы.
Шулай уҡ ул йәмәғәт һәм медиа проекттарында әүҙем ҡатнашҡан. Башҡортостан телевидениеһында ойошторолған ир-егеттәрҙең «Арыҫлан» клубы, «Алтын тирмә» телепроекты ойоштороусыларҙың береһе була. «Юлдаш» радиоһында «Асыҡ студия» тапшырыуын алып бара.
«Йәшлек», «Башҡортостан», «Киске Өфө», «Йәншишмә» гәзиттәре, «Шоңҡар», «Аманат» журналдарың йыл лауреаты, Башҡортостан юлдаш телевидениеһында эксперт булып ҡатнаша[3].
Йәмәғәт эшмәкәрлеге
Илдар Ғәбитов йәмәғәт тормошонда әүҙем ҡатнаша. Мәҙәни-интеллектуаль проекттар ойоштороуҙа, матбуғатта ижтимағи һәм социаль мәсьәләләрҙе күтәреүҙә ҙур өлөш индерә.
Ул шахмат уйыны менән мауыҡҡан. Уның иҫтәлегенә Әбйәлил районында шахмат турниры үткәрелә[3].
Ғаиләһе
Илдар Миҙхәт улы өлгөлө ғаилә башлығы була. Ҡатыны Дилара Самат ҡыҙы менән өс бала тәрбиәләп үҫтерәләр[2].
Хәтер
2025 йылда уның вафатынан һуң тыуған районында — Әбйәлилдә — Илдар Ғәбитов иҫтәлегенә шахмат турниры ойошторола. Ярышта райондың төрлө ауылдарынан шахмат һөйөүселәр ҡатнаша[3].
Хеҙмәттәре
- «Капитал» Карла Маркса: Практикум. — Уфа, 2009.
- Башҡортса башватҡыстар: кроссвордтар. — Өфө, 2013.
Иҫкәрмәләр
- ↑ В Уфе скончался доцент Уфимского Университета Науки и Технологий, кандидат экономических наук и известный башкирский сканвордист Ильдар Габитов. Полномочное Представительство Республики Башкортостан при Президенте Российской Федерации (9 ғинуар 2025). Мөрәжәғәт итеү датаһы: 13 март 2026.
- ↑ 1 2 Ушёл из жизни Ильдар Габитов. газета Республика Башкортостан (10 ғинуар 2025). Мөрәжәғәт итеү датаһы: 13 март 2026.
- ↑ 1 2 3 Ғәбитов Илдар Миҙхәт улы (билдәһеҙ). Йәшлек (22 февраль 2026). Мөрәжәғәт итеү датаһы: 13 март 2026.