Ҡулдыбай

Ҡулдыбай Белорет һәм Верхнеурал ҡалалары араһында, Ҡотантау һыртының төньяҡ итәгендә, Аһылай ауылынан төньяҡтараҡ урынлашҡан. Күлдең майҙаны 215 гектар тәшкил итә. Уның көнсығышында — Өскүл, ә төньяғында Янсыҡты күлдәре ята^[1].

Күл таулы урында урынлашҡан. Ярҙары башлыса һөҙәк; уларҙа һирәк ҡайынлыҡтар, ҡыуаҡтар һәм болон үҫемлектәре осрай. Төньяҡ өлөшөндәге яр зонаһы урыны менән һаҙлыҡлы. Күлдән ҙур булмаған шишмә ағып сыға.

Күл тирәһе матур тәбиғәт ландшафты, ҡуйы урмандар һәм флора менән фаунаның төрлөлөгө менән билдәле^[2][3].

Күлдәге һыу ярайһы уҡ таҙа һәм үтә күренмәле. Төбө башлыса ҡомло. Һыу ятҡылығы тәбиғи сығышлы.

Ҡулдыбай күле тәбиғәттә популяр ял итеү урыны булып тора. Бында палаткалар менән йәки автомобилдә «ҡырағай» ҙа, ойошҡан рәүештә лә ял итергә мөмкин. Көнсығыш ярында «Диостан» ял үҙәге урынлашҡан. Күл биләмәһенә инеү бушлай. Моторлы кәмәләр ҡулланырға рөхсәт ителә^[2].

Күл балыҡҡа бай һәм бигерәк тә йәйге осорҙа күпләп балыҡсыларҙы йәлеп итә. Күлдә сабаҡ, аҡ сабаҡ, суртан, алабуға, ротан балыҡтары йәшәй. Уларҙың запастары сәнәғәт балыҡсылығын йәйелдереү өсөн яраҡлы^[4][3].

• Һыу объектының тибы: күл
• Бассейн округы: Урал бассейн округы
• Йылға бассейны: Урал (бассейндың Рәсәй өлөшө)
• Һыу хужалығы участкаһы: Урал йылғаһының инешенән Верхнеурал гидроузелына тиклем
• Һыу объектының коды: 12010000111199000000010^[5]