Мортазин Әхәт Мотаһар улы
Әхәт Мотаһар улы Мортазин (рус. Муртазин Ахат Мутагарович; 1959 йылдың 6 феврале, Яңы Байрамғол ауылы, Башҡорт АССР-ы — 2018 йылдың 13 марты, Өфө) — Башҡортостан радио-телевидение дикторы, журналист, режиссёр. Оҙаҡ йылдар «Башҡортостан» дәүләт телерадиокомпанияһы һәм «Юлдаш» радиоһында эшләгән. Йыш ҡына «Башҡортостандың алтын тауышы», «Башҡорт Левитаны» тип аталған.
Биографияһы
Әхәт Мотаһар улы Мортазин 1959 йылда Башҡорт АССР-ының Учалы районында тыуған. Урта мәктәпте тамамлағандан һуң, Өфө ҡалаһында урынлашҡан Башҡорт дәүләт университетының башҡорт филологияһы һәм журналистика факультетында белем ала. Университетты 1986 йылда тамамлай.
Юғары уҡыу йортон тамамлағас, хеҙмәт юлын республика радиоһында башлай. Артабан ғүмере буйы тиерлек башҡорт радиоһы һәм телевидениеһы системаһында эшләй. Ул 30 йылдан ашыу дәүләт телерадиокомпанияһы «Башҡортостан» эфирында хеҙмәт итә.
Мортазиндың үҙенсәлекле, моңло һәм бәрхәт кеүек йомшаҡ тембрлы тауышы республика халҡына яҡшы таныш була. Ул яңылыҡтар сығарылыштарын уҡый, актуаль репортаждар алып бара, республика һәм хөкүмәт сараларын, концерттарҙы һәм төрлө байрамдарҙы алып барыусы була. Шулай уҡ тура эфир трансляцияларында ҡатнаша.
Күп йылдар ул «Юлдаш» радиоһында ла эшләй, тыңлаусыларҙы көн һайын яңылыҡтар менән таныштыра. Уның тауышы иртән радио тулҡындары аша «Өфө һөйләй» тигән һүҙҙәр менән эфирҙы аса, ә кисен балалар өсөн «Сәңгелдәк» телевизион тапшырыуы аша кескәй тамашасыларҙы йоҡларға әҙерләй[1].
Коллегалары араһында Әхәт Мортазин зыялы, иғтибарлы һәм ярҙамсыл кеше булараҡ иҫтә ҡала. Ул йәш журналистар өсөн остаз һәм кәңәшсе була, эфирҙа эшләгән күп кенә алып барыусылар уның дикторлыҡ мәктәбен үткән.
2018 йылдың 13 мартында Өфө ҡалаһында Әхәт Мортазин кинәт вафат була. Үлеменең сәбәбе — йөрәк эшмәкәрлегенең туҡтауы. Уға 59 йәш була.
Хәтер
Әхәт Мортазиндың тауышы һәм ижади мираҫы республика радио-телевидениеһының «алтын фонды»нда һаҡлана.
2023 йылдың 31 майында Өфөлә күренекле диктор хөрмәтенә мемориаль таҡтаташ асылды. Ул С. Перовская урамы, 19/2 йорт фасадына ҡуйылған; Мортазин был йортта 2004—2018 йылдарҙа йәшәгән.
Уның иҫтәлегенә Башҡортостанда төрлө саралар үткәрелә:
- республика киң мәғлүмәт саралары хеҙмәткәрҙәре араһында Әхәт Мортазин иҫтәлегенә волейбол турниры;
- Учалы районында уның исемендәге асыҡ республика нәфис һүҙ уҡыусылар конкурсы;
- тыуған яғында мәктәп музейы эшләй;
Яңы Байрамғол мәктәбе сығарылыш уҡыусыларына йыл һайын Әхәт Мортазин исемендәге премия тапшырыла[2].
Ғаиләһе
Әхәт Мортазиндың ҡатыны — телерадиокомпания «Башҡортостан» дәүләт унитар предприятиеһы генераль директоры урынбаҫары Тәнзилә Үлмәҫбаева. Ғаиләлә ике бала тәрбиәләп үҫтерҙеләр[3].
Маҡтаулы исемдәре һәи башҡа бүләктәре
- Башҡортостан Республикаһының халыҡ артисы (2009);
- Башҡортостан Республикаһының атҡаҙанған артисы (1994).
Иҫкәрмәләр
- ↑ «Башкортостан», ГТРК. Воспоминания коллег о «Золотом голосе Башкортостана» Ахате Муртазине (баш.), ГТРК «Башкортостан» (14 март 2018). 13 март 2026 тикшерелгән.
- ↑ 31 мая 2023. В Уфе открыли мемориальную доску в честь прославленного диктора Ахата Муртазина. "Башинформ": Новости Уфы и Башкортостана. Мөрәжәғәт итеү датаһы: 13 март 2026.
- ↑ Воспоминания коллег о «Золотом голосе Башкортостана» Ахате Муртазине. ГТРК Башкортостан. Мөрәжәғәт итеү датаһы: 13 март 2026.
Һылтанмалар
- Мортазин Әхәт Мотаһар улы // Башҡорт энциклопедияһы. — Өфө: «Башҡорт энциклопедияһы» ғилми-нәшриәт комплексы, 2015—2020. — ISBN 978-5-88185-143-9. (Тикшерелеү көнө: 2 февраль 2021)