Кәримов Вил Сәғит улы
Вил Сәғит улы Кәримов (рус. Виль Сагитович Каримов; 1935 йылдың 21 марты, Кәрим, Учалы, Башҡорт АССР-ы, СССР — 2017 йылдың 31 октябре, Өфө) — совет режиссёры, дәүләт эшмәкәре. 1969—1976 йылдарҙа Башҡорт АССР-ының мәҙәниәт министры, 8-се һәм 9-сы саҡырылыш Юғары Советы депутаты. Башҡорт АССР-ының атҡаҙанған сәнғәт эшмәкәре (1985).
Биографияһы
1935 йылдың 21 мартында Башҡорт АССР-ының Учалы районы Кәрим-Төпәй ауылында (хәҙер Кәрим) тыуған.
1959 йылда А. В. Луначарский исмендәге дәүләт театр сәнғәте институтын (ГИТИС-ты) тамамлаған.
1969 йылда Мәскәүҙә Юғары партия мәктәбен тамамлаған. 1959 йылдан — Башҡорт драма театры актеры, ә 1962—1964 йылдарҙа режиссер булып эшләй. 1964—1967 йылдарҙа — КПСС-тың Башҡортостан өлкә комитеты инструкторы була.
1976—1983 йылдарҙа — Башҡорт АССР-ының Телевидение һәм радиотапшырыуҙар буйынса дәүләт комитетының баш режисеры.
1969—1976 йылдарҙа — Башҡорт АССР-ының мәҙәниәт министры.
1983 йылдан — Башҡорт дәүләт филармонияһының художество етәксеһе, 1988—1990 йылдарҙа — Башҡортостан профсоюздарының өлкә советы инструкторы.
1990—1992 йылдарҙа — республика Мәҙәниәт министрлығының бүлек начальнигы, 1992 йылдан алып «Башкортостан» киностудияһы директоры, 1993—2000 йылдарҙа — режиссеры була.
Башҡорт АССР-ы Юғары советының 8-9 саҡырылыш депутаты[1].
2017 йылдың 31 октябрендә Өфөлә вафат була.
Фильмографияһы
«Сәскә ат, Башҡортостан!» документаль фильмы (1969), «Һауынсы портреты» (1977), «Йомарт ер» (1979), «Тамырҙар» (1992), «Ғәскәров», «Төньяҡ амурҙары», «Ҡурай» һәм башҡа фильмдар, 20-нән ашыу тематик концерт тамашаһы, шул иҫәптән Бөтә донъя йәштәр һәм студенттар фестивалендә Башҡортостан сәнғәте оҫталары концерты (Мәскәү, 1985) сценарийҙары авторы һәм режиссеры[2].
Ғаиләһе
- Һеңлеһе — Рәсимә Кәримова, диктор;
- Ҡатыны — Роза Кәримова, Башҡорт драма театры һәм Йәштәр театры актрисаһы;
- Улы — Булат Кәримов, режиссер һәм алып барыусы.
Иҫкәрмәләр
- ↑ Башинформ
- ↑ Әлибаев С. Ә. Кәримов Вил Сәғит улы // Башҡорт энциклопедияһы. — Өфө: «Башҡорт энциклопедияһы» ғилми-нәшриәт комплексы, 2015—2020. — ISBN 978-5-88185-143-9.