Мухин Владимир Иванович (архитектор)

Владимир Иванович Мухин 1942 йылдың 28 авгусында Өфө ҡалаһында тыуа. 1971 йылда Ленинград инженер-төҙөлөш институтын тамамлай.

1989 йылдан Ҡыҙыл Байраҡлы Ленинград юғары хәрби инженер-төҙөлөш училищеһының (ЛВВИСКУ-ВИСИ) «Биналар һәм ҡоролмалар» кафедраһын етәкләй. 1993 йылда уның туранан-тура ҡатнашлығында булдырылған хәрби архитектура кафедраһына ла етәкселек итә.

Отставкаға сыҡҡандан һуң кафедра профессоры вазифаһында ғилми-педагогик эшмәкәрлеген дауам итә. «Хәрби инженер» фәнни журналы мөхәрририәте коллегияһы ағзаһы була^[2].

2021 йылдың 20 ғинуарында 78 йәшендә Санкт-Петербургта ҡыҫҡа ваҡытлы ауырыуҙан һуң вафат була^[3][4][5].

Төп фәнни ҡыҙыҡһыныуҙары хәрби архитектураны, уның тарихи үҫешен һәм ғәскәрҙәрҙе ойоштороуҙағы ролен, шулай уҡ йәшәү эшмәкәрлегенең социаль-көнкүреш һәм мәҙәни аспекттарына йоғонтоһон тикшереү менән бәйле була^[6][7].

100-ҙән ашыу фәнни хеҙмәт, шулай уҡ 30-ҙан ашыу архитектура һәм тикшеренеү проекты, шул иҫәптән халыҡ-ара проекттар авторы^[4].

Халыҡ-ара мәҙәни-архитектура проекттарында ҡатнаша. Атап әйткәндә, Рус музейы һәм Италияның Сорренто ҡалаһы хакимиәтенең рәссам Сильвестр Щедрин иҫтәлегенә арналған берлектәге проектында ҡатнаша.

2007 йылда Соррентола рәссамдың ҡәбер ташын реставрациялауҙың беренсе этабын тамамлау тантанаһы үтә. 2013 йылда Корреале музейы баҡсаһында ҡуйылған Щедриндың бронза бюсы тантаналы рәүештә ҡала ҡарамағына тапшырыла^[3].

• Рәсәй Федерацияһының атҡаҙанған архитекторы;
• Архитектура докторы^[3].