Сакат күле

Һыу ятҡылығы Кама бассейны округына ҡарай (Бөрө ҡалаһынан алып йылғаның тамағына тиклем Ағиҙел һыу хужалығы участкаһы) һәм Ағиҙел йылғаһының уң яҡ ярында, Әңгәсәк ауылынан алыҫ түгел ерҙә урынлашҡан^[1].

Күл өҫтө майҙаны 0,2 квадрат километр^[1], оҙонлоғо ике километр, киңлеге 100 метр^[2] тәшкил итә. Күл башлыса яуым-төшөм һәм ер аҫты һыуҙары менән тулыландырыла. Тирә-яҡ ландшафты япраҡлы урмандан ғибәрәт, унда тал, йыла, йүкә, ерек, күк тирәк үҫә. Ҡыуаҡтар араһында ҡара бөрлөгән һәм гөлйемеш осрай.

Һыу ятҡылығында һәм уның тирә-яғында шырт балыҡ, табан балыҡ, ҡарабалыҡ, алабуға, сабаҡ, суртан, опто йәшәй. Һөтимәрҙәрҙән ҡондоҙ, ҡама һәм ондатра бар. Ҡоштар араһында ябай ҡарасабан һәм башҡа өйрәк төрҙәре осрай.

Күлдең атамаһы боронғо төрки теленән тәржемә иткәндә «тау итәге», «уйһыулыҡ» тигәнде аңлата^[3].

Күлгә Әңгәсәк йылғаһы ҡоя^[4]. Сакат һәм Ағиҙел йылғаһы бер-береһе менән тоташҡан^[5].

Рәсәй дәүләт һыу реестрында объекттың коды — 10010201611111100006452^[1].