Шөғәйепов Вәкил Шакир улы

1936 йылдың 29 авгусында Башҡорт АССР-ының Малаяҙ районы (хәҙер — Салауат районы) Әлкә ауылында тыуған^[1].

Төньяҡ флотта хеҙмәт итеп ҡайтып^[2], Ҡазан художество училищеһын тамамлай (1963). Өфөнөң 77-се урта мәктәбендә рәсем һәм һыҙма дәрестәрен уҡыта (1963—1966), РСФСР Художество фондының Башҡортостан бүлексәһе рәссамы (1966—1981). 1981 йылдан ғүмеренең аҙағына тиклем ҡурай — халыҡ тынлы музыка ҡоралын эшләү оҫтаһы була, шпон ҡурай эшләү ысулын таба^[2].

1974 йылда авторлыҡ хоҡуғын раҫлата^[2]. Думбыраның — башҡорт халҡының ҡыллы сиртмә уйын ҡоралының һаҡланып ҡалған өлгөләрен эҙләү һәм уны тергеҙеү менән шөғөлләнә. 1985 йылдың майында ул эшләгән думбыра өлгөләре (сопрано, альт, бас) киң етештереүгә тәҡдим ителгән һәм производствоға индерелә.

1995 йылда халыҡҡа милли һыҙғыслы музыка ҡоралы — реконструкцияланған ҡыл-ҡумыҙҙы тәҡдим итә. Уға 1998 йылда патент ала^[1]

Вәкил Шөғәйеповтың эштәре Башҡортостан Республикаһы Милли музейында, Мәскәүҙә М. И. Глинка исемендәге Дәүләт үҙәк музыка мәҙәниәте музейында, Рәсәйҙә һәм сит илдәрҙә щәхси коллекцияларҙа һаҡлана.

2017 йылдың 27 июнендә Өфө ҡалаһында вафат була. Тыуған Салауат районының Әлкә ауылында ерләнә.

• СССР Халыҡ хужалығы ҡаҙаныштары күргәҙмәһенең бронза миҙалы (1984);
• Башҡорт АССР-ының атҡаҙанған сәнғәт эшмәкәре (1988) — халыҡ уйын ҡоралдарын реконструкциялау буйынса проекттары өсөн;
• «Алтын ҡул-оҫта» Республика конкурсы лауреаты (2004);
• Рәсәй Федерацияһы Хөкүмәтенең «Рәсәй күңеле» премияһының «Халыҡ музыкаһы» номинацияһы лауреаты (2013) — халыҡ ижадын үҫтереүгә индергән өлөшө өсөн^[2].

• «Мастер Вакиль» — документаль фильм, ВГИК киностудияһында режиссёр Азамат Хужахмәтов һәм оператор Леонид Мешков төшөрә (1992)^[2].