Рәсәй 2024 йылғы йәйге Олимпия уйындарында

Украинала махсус хәрби операция башланғандан һуң, Халыҡ-ара олимпия комитеты халыҡ-ара спорт федерацияларына рәсәйҙәрҙе ярыштарға индермәҫкә тәҡдим итә. Әммә март айында уҡ шәхси атлеттарға нейтраль статуста сығыш яһарға рөхсәт бирә^[1].

2022 йылдың октябрендә Халыҡ-ара олимпия комитеты үҙенең составына ДНР, ЛНР, Херсон һәм Запорожье өлкәләренең олимпия советтарын индергән өсөн Рәсәй Олимпия комитетын Уйындарҙан ситләтә^[2].

30 ил Рәсәй спортсыларының Олимпиадала ҡатнашыуына ҡаршы була, ләкин Халыҡ-ара олимпия комитеты 2023 йылдың декабрендә сығыш яһарға рөхсәт итә^[3]. Шул уҡ ваҡытта комитет Парижға барасаҡ атлеттарға талаптар билдәләй:

• Олимпиадала нейтраль статуста ғына сығыш яһарға мөмкин
• Спортсылар үҙҙәрен шәхсән үҙҙәре күрһәтә, шуға күрә асыу тантанаһында команда булараҡ ҡатнаша алмаясаҡ
• Теләһә ниндәй дәүләт символикаһы ла тыйыла. Халыҡ-ара олимпия комитеты Рәсәй атлеттары өсөн яңы флаг һәм гимн уйлап таба
• Яуланған миҙалдар Уйындарҙың дөйөм зачётында иҫәпкә алынмай
• Уйындарға халыҡ-ара ярыштарҙа олимпия лицензияһын алғандарға ғына рөхсәт ителә
• Рәсәй көс структураларына ҡағылышы булған һәм Махсус хәрби операцияны асыҡтан-асыҡ хуплаған спортсылар Олимпия уйындарына индерелмәй
• Рәсәй команда спорт төрҙәренең береһендә лә ҡатнаша алмай

2024 йылдың февралендә Рәсәй Президенты Владимир Путин Рәсәй Олимпия комитеты менән Спорт министрлығына рәсәйҙәрҙең Олимпиадала ҡатнашыуы буйынса тәҡдимдәр әҙерләргә ҡуша^[4]. Мартта Рәсәй Олимпия комитеты Уйындарға бойкот иғлан итмәҫкә ҡарар итә, әммә Парижға нейтраль статуста барған спортсылар ойошма ярҙамына иҫәп тота алмай^[5].

Әммә быға тиклем үк бер төркәм Рәсәй атлеттары һәм спорт федерациялары Халыҡ-ара олимпия комитеты талаптарына риза булмай һәм Францияла сығыш яһауҙан баш тарта. Мәҫәлән, спорт һәм художество гимнастикаһы, йөҙөү, һыуға һикереү, уҡтан атыу, фехтование, ауыр һәм еңел атлетика, бокс, синхрон йөҙөү, бадминтон, ат спорты, өҫтәл теннисы һәм триатлон вәкилдәре. Халыҡ-ара олимпия комитеты башлығы Томас Бахтың апрель айында Рәсәй спортына ҡарата бер нисә киҫкен сығышынан һуң^[6], Рәсәй ишкәк спорты федерацияһы Уйындарҙа ҡатнашыуҙан баш тарта^[7]. Парижға барыуҙан баш тартыу ҡарарын Ҡырым атлеттары ла хуплай^[8].

Олимпиадаға нейтраль статуста барырға ниәттәре тураһында көрәш, дзюдо, тхэквондо, батутта һикереү, теннис, елкән спорты һәм велоспорт вәкилдәре белдерә. Олимпия юлламаһына 14 Рәсәй көрәшсеһе дәғүә итә. Лицензиялар апрелдә Баҡыла Европа квалификация турнирында уйнатыла.

2024 йылдың мартында Халыҡ-ара олимпия комитетында белдереүҙәренсә, олимпия лицензияларын 12 рәсәйле: дзюдосылар Рамазан Абдулаев, Махмадбек Махмадбеков, Давид Карапетян, Михаил Игольников, Матвей Каниковский, Инал Тасоев, Сабина Гилязова, Дарья Курбонмамадова, Мадина Таймазова һәм Элис Старцева ала.

2024 йылдың майында Олимпия лицензияһын ишкәкселәр Алексей Коровашков һәм Иван Штыль яулай^[9].

Халыҡ-ара олимпия комитеты Олимпия уйындарында ҡатнашырға рөхсәт ителгән Рәсәй спортсыларының исемлеген 18 июлдә раҫлай. Исемлектә 15 атлет:

• Тамара Дронова (велоспорт)
• Алёна Иванченко (велоспорт)
• Глеб Сырица (велоспорт)
• Анжела Бладцева (батутта һикереү)
• Даниил Медведев (теннис)
• Роман Сафиуллин (теннис)
• Екатерина Александрова (теннис)
• Мирра Андреева (теннис)
• Павел Котов (теннис)
• Диана Шнайдер (теннис)
• Елена Веснина (теннис)
• Захар Петров (байдарка һәм каноэла ишеү)
• Алексей Коровашков (байдарка һәм каноэла ишеү)
• Олеся Ромасенко (байдарка һәм каноэла ишеү)
• Евгений Сомов (Йөҙөү)

2024 йылдың декабрендә Рәсәй хөкүмәте Париждағы Олимпия уйындарында Рәсәй миҙалсыларына бер тапҡыр бирелә торған аҡсалата бүләк күләмен билдәләй. Алтын миҙал өсөн — 4 миллион һум, көмөш өсөн — 2,5 миллион һум, бронза өсөн — 1,7 миллион һум түләнәсәк. Парлы разрядта көмөш миҙал алған тенниссылар Мирра Андреева һәм Диана Шнайдер уҙған Уйындарҙа Рәсәйҙән берҙән-бер миҙал яулаусылары^[10].