Диваев Рәшит Мансур улы

1929 йылдың 12 ғинуарында Башҡорт АССР-ының Стәрлетамаҡ кантонындағы Туҡай ауылында (хәҙерге Башҡортостан Республикаһының Ауырғазы районында) тыуа^[1][2].

Хеҙмәт эшмәкәрлеген 1943 йылда Ауырғазы районының Сталин исемендәге колхозында башлай. 1947 йылдан Өфө паровоздар ремонтлау заводында сәнәғәт ҡорамалдары слесары булып эшләй. 1951—1954 йылдарҙа Совет Армияһы сафында хеҙмәт итә^[1].

1954 йылдан алып Туҡай ауылында баҫыусылыҡ бригадаһы бригадиры була. 1958 йылда Стәрлетамаҡ ауыл хужалығы мәктәбен тамамлай. 1958—1960 йылдарҙа Ауырғазы районында — «Ленин юлы» колхозы рәйесе урынбаҫары, 1960 йылдан «Октябрь» колхозының баш агрономы булып эшләй. 1968 йылда Башҡорт ауыл хужалығы институтын тамамлай^[1][2].

Ул эшләгән осорҙа хужалыҡта иҡтисади күрһәткестәр үҫә: баҫыуҙарҙа уңдырышлылыҡ, фермаларҙа етештереүсәнлек арта. Иген, техник һәм мал аҙығы культураларының уңдырышлылығын арттырыуға тупраҡты эшкәртеү ысулдарын ҡулланыу, сәсеү әйләнешен камиллаштырыу, органик ашламаларҙы файҙаланыу юлы менән өлгәшелә^[1].

1969 йылда «Октябрь» колхозы иген етештереү планын 162 процентҡа үтәй, уңыш гектарынан 21,3 центнер тәшкил итә. Дәүләткә 17 745 центнер иген һатыла (план 9 100 центнер була), был заданиеға ҡарата 195 процент тәшкил итә. Колхоз бураларына 5 500 центнер орлоҡ һалына (ихтыяж 4 500 центнер була). 1970 йылда хужалыҡ иген культураларының һәр гектарынан — 24,8 центнер, шәкәр сөгөлдөрөнән — 281 центнер, картуфтан — 150 центнер, кукуруздың йәшел массаһынан — 240 центнер, тамыраҙыҡтарҙан — 440 центнер, бесән үләндәренән 28 центнер йыйып ала^[2]. Дәүләткә йыллыҡ ит һатыу планы — 140 процентҡа, һөт — 180 процентҡа, йөн тапшырыу 123 процентҡа үтәлә, һауым һәр һыйырҙан 2 846 килограмм тәшкил итә^[1].

Һигеҙенсе биш йыллыҡ (рус.)баш. (1966—1970) осоронда ауыл хужалығы продукцияһын тулайым етештереү, 1961—1965 йылдар кимәле менән сағыштырғанда, иген буйынса — 180 процент, шәкәр сөгөлдөрө буйынса — 175 процент, картуф буйынса — 190 процент, мал аҙығы культуралары буйынса 150 процент тәшкил итә. Иген буйынса биш йыллыҡ әҙерлек планы — 208 процентҡа, шәкәр сөгөлдөрө буйынса — 136 процентҡа, картуф буйынса — 103 процентҡа, һөт буйынса — 149 процентҡа, ит буйынса — 126 процентҡа, йөн буйынса 123 процентҡа үтәлә^[1].

Ауыл хужалығы производствоһын үҫтереүҙә һәм дәүләткә игенселек һәм малсылыҡ продукттарын тапшырыуҙың биш йыллыҡ планын үтәүҙә өлгәшкән ҙур уңыштары өсөн СССР Юғары Советы Президиумының 1971 йылдың 8 апрелендәге Указы менән Р. М. Диваевҡа Социалистик Хеҙмәт Геройы исеме бирелә^[1].

1994 йылда хаҡлы ялға сыға, әммә 1995 йылға тиклем «Октябрь» колхозында эшләүен дауам итә^[2]. 2010 йылдың 7 сентябрендә вафат була^[1].

• Социалистик Хеҙмәт Геройы (Ленин ордены һәм «Ураҡ һәм Сүкеш» миҙалы, 1971 йылдың 8 апреле);
• «Почёт Билдәһе» ордены (1966);
• СССР миҙалдары;
• Башҡорт АССР-ының атҡаҙанған агрономы (1981);
• Башҡортостан Республикаһы Ауырғазы районының почётлы гражданины^[1].

• Животноводству — полноценные корма. — Уфа, 1973^[2].