Озолин Владислав Анатольевич

Тәүҙә «Авангард» (1991/92) һәм «Новойл» (1992/93—1995/96) фарм-клубтары өсөн уйнай. Артабан «Салауат Юлаев», Мәскәүҙең ЦСКА, Тольяттиҙың «Лада», Хабаровскиҙың «Амур», Ханты-Мансийскиҙың «Югра» һәм Орскиҙың «Көньяҡ Урал» командалары уйынсыһы була.

2015 йылдың 27 ғинуарында Өфөлә «Мин һине аңлайым!» лозунгыһы аҫтында хәйриә осрашыуында ҡатнаша. Хоккей матчы һаңғырауҙар өсөн мәктәп-интернат тәрбиәләнеүселәре, Башҡортостан спорты ветерандары һәм Төнгө хоккей лигаһы уйынсылары ҡатнашлығында уҙа^[1].

2017 йылдың ноябрендә Өфөлә Спорт һарайында Төнгө хоккей лигаһының етенсе миҙгелен асҡан һәүәҫкәрҙәр араһында «Салауат Юлаев» ветерандары һәм «Ағиҙел» ҡатын-ҡыҙ хоккейсылар командалары матчында боҙға уйнарға сыға. «Ағиҙел» хоккейсылары яҡлы сығыш яһаған Башҡортостан хоккейының данлыҡлы ветерандары араһында ул да була^[1].

Өфөләр топ-клуб булмаған йылдарҙа уҡ «Салауат Юлаев» өсөн ун миҙгел үткәрә (1995/96 — 2005/2006). Өфө клубы өсөн бөтәһе 80 мәрәй йыя (20+60). Команда өсөн 442 матч — етди, ихтирамға лайыҡ күрһәткес. Әммә һаҡсының уңышлы һәм уңышһыҙ уйындары сиратлап килә, ул йыш ҡына тренерҙар штабы тарафынан тәнҡитләнә^[2].

Артабан ЦСКА (2006/07, 62 уйын үткәрә, 13 (2+11) мәрәй йыя)^[3], «Лада» клубтарында уйнай^[4] (2007/08, 53 уйын үткәрә, 9 (3+6) мәрәй йыя)^[5]. 2008 йылдың майында «Амур» менән килешеү төҙөй^[6], әммә 19 августа клубтан китә^[7]. 2008/09 йылдар миҙгелендә «Югра» һәм «Көньяҡ Урал» өсөн сығыш яһай.

Мәскәүҙең ЦСКА клубында саҡта Вячеслав Быков һәм Игорь Захаркиндың ҡул аҫтында ла уйнай. Карьераһын 2009 йылда тамамлай һәм "Салауат Юлаев"тың Олимпия резервындағы балалар-үҫмерҙәр спорт мәктәбендә эшләй^[2].

1995/96 йылдарҙа МХЛ-дың бронза призеры. 1997 йылда Универсиаданың хоккей турнирында ҡатнаша.

Нефтекама ҡалаһының 2006 (2019—2021) һәм 2015 (2022—2023) йылдарҙа тыуған хоккейсыларҙан тупланған «Торос» командаһы баш тренеры була^[8]. 2024 йылдан алып Ямал-Ненец автономиялы округының Тарко-Сале ҡалаһында 2010 йылда тыуған хоккейсыларҙан торған «Факел-Ямал» командаһының баш тренеры^[9], юғары профессиональ белемле уҡытыусы-тренер^[10].