Сәғитов Салауат Тәлғәт улы
Салауат Тәлғәт улы Сәғитов (рус. Салават Талгатович Сагитов; 1977 йылдың 22 апреле, Өфө) ― дәүләт органдары һәм юғары мәктәп хеҙмәткәре, социолог-ғалим. 2010 йылдан Өфө ҡалаһы Киров район хакимиәте башлығы, 2011 йылдан — Башҡортостан Республикаһы Хөкүмәте Премьер-министры урынбаҫары, 2019 йылдан Мифтәхетдин Аҡмулла исемендәге Башҡорт дәүләт педагогия университеты ректоры. Социология фәндәре кандидаты (2002), доцент. Рәсәй Федерацияһы Президентының Почёт грамотаһы менән бүләкләнеүсе (2015), Башҡортостан Республикаһының Фән һәм техника өлкәһендәге йәштәр дәүләт премияһы лауреаты (2004) һәм Григорий Аксаков ордены кавалеры (2026).
Биографияһы
Сәғитов Салауат Тәлғәт улы 1977 йылдың 22 апрелендә Өфөлә тыуған. 1994 йылда Өфө дәүләт авиация техник университетына уҡырға инә, уны 1999 йылда «Дәүләт һәм муниципаль идара итеү» һөнәре буйынса тамамлай (квалификацияһы менеджер).
2002 йылда, «социология фәндәре кандидаты» ғилми дәрәжәһенә дәғүә итеп, диссертация яҡлай, тикшеренеү темаһы «Башҡортостан Республикаһы төбәктәрендә социаль — демографик процестар». Доцент ғилми исеме бирелә.
Хеҙмәт юлы
Хеҙмәт эшмәкәрлеген Өфө ҡалаһы хакимиәтендә (мәғлүмәт-гуманитар бүлек) башлай, унда 1994—2000 йылдарҙа әйҙәүсе белгестән бүлек начальнигы урынбаҫарына тиклем юл үтә. 2000—2003 йылдарҙа Өфө хакимиәтенең мәҙәниәт һәм сәнғәт буйынса комитеты начальнигы урынбаҫары, 2003—2005 йылдарҙа — йәштәр сәйәсәте буйынса комитет вазифаһын башҡарыусы, һуңынан рәйесе вазифаһын биләй. 2006—2008 йылдарҙа — Өфө ҡала округы хакимиәтенең йәштәр сәйәсәте буйынса комитеты рәйесе.
2008 йылдың апрелендә — 2009 йылдың мартында башҡортостан Республикаһының йәштәр сәйәсәте буйынса Дәүләт комитеты менән етәкселек итә, һуңынан (2009 йылдың апрелендә-2010 йылдың авгусында) БР йәштәр сәйәсәте, спорт һәм туризм министры урынбаҫары була. 2010 йылдың авгусынан 2011 йылдың декабренә тиклем — Өфөнөң Киров районы хакимиәте башлығы булып эшләй.
2011 йылдың декабренән — 2018 йылдың октябренә тиклем Башҡортостан Республикаһы Хөкүмәте рәйесе урынбаҫары вазифаһын башҡара.
Бер үк ваҡытта 2002 йылдан 2019 йылға тиклем Өфө дәүләт авиация техник университетында эшләй (ассистент, өлкән уҡытыусы, социология һәм социаль технологиялар кафедраһы доценты). 2009—2010 йылдарҙа Өфө дәүләт иҡтисад һәм сервис академияһының милли мәҙәниәттәр кафедраһы мөдире.
2018 йылдың октябрендә — 2019 йылдың сентябрендә — ректор вазифаһын ваҡытлыса башҡарыусы, 2019 йылдың сентябренән М. Н.Аҡмулла исемендәге Башҡорт дәүләт педагогия университеты ректоры (рус.)баш.[1]. 2023 йылда Башҡортостан Республикаһы Дәүләт Йыйылышы — Ҡоролтай депутаты итеп һайлана (етенсе саҡырылыш)[2].
2019 йылдың 27 авгусында Рус география йәмғиәтенең Башҡортостан төбәк бүлексәһенең дөйөм йыйылышында ойошманың яңы етәксеһе итеп башҡортостан хөкүмәтенең элекке вице-премьеры, хәҙер БДПУ ректоры Салауат Сәғитов һайланды[3].
Ғилми эшмәкәрлеге
Сәғитов С.Т. мәғариф социологияһы, йәштәр сәйәсәте һәм төбәк үҫеше буйынса 30-ҙан ашыу фәнни баҫма авторы. «Идара итеү социологияһы», «Мәғарифта социаль технологиялар» һәм башҡа курстар алып бара.
Маҡтаулы исемдәре һәм башҡа бүләктәре
- 2007 йылда — Башҡортостан Республикаһының Йәштәр сәйәсәте буйынса дәүләт комитетының Почёт грамотаһы;
- 2008 йылда — Башҡортостан Республикаһы Мәғариф министрлығының Почёт грамотаһы ;
- 2015 йылда —Рәсәй Федерацияһы Президентының Почёт грамотаһы;
- 2017 йылда — Федерация Советының Социаль сәйәсәт буйынса комитетының Рәхмәт Хаты;
- 2018 йылда — Башҡортостан Республикаһы Башлығының Рәхмәт хаты;
- 2020 йылда — Башҡортостан Республикаһының атҡаҙанған мәғариф хеҙмәткәре;
- 2022 йылда — Рәсәй Федерацияһының мәғариф өлкәһенең почётлы хеҙмәткәре;
- 2022 йылда — Рәсәй Федерацияһы Мәғариф министрлығының Рәхмәт хаты;
- 2022 йылда — Рус география йәмғиәте рәйесенең Почёт грамотаһы[2];
- 2025 йылда — Рәсәй Федерацияһы Президентының Рәхмәт хаты[4];
- 2026 йылда — Башҡортостан Республикаһының Григорий Аксаков ордены[5].
Ғәиләһе
- Атаһы — Сәғитов Тәлғәт Ниғмәтулла улы, башҡорт журналисы һәм дәүләт эшмәкәре. 1986—1987 һәм 1997—2001 йылдарҙа Башҡортостандың мәҙәниәт министры.
- Әсәһе — Сәғитова Фәрзәнә Фәтҡулла ҡыҙы, йырсы, вокал буйынса педагог, юғары мәктәп уҡытыусыһы. Профессор (2009). Салауат Юлаев ордены кавалеры (2018), Рәсәй Федерацияһының (2008) һәм Башҡортостан Республикаһының (1997) атҡаҙанған сәнғәт эшмәкәре, Башҡорт АССР-ының атҡаҙанған мәҙәниәт хеҙмәткәре (1983). Ғәзиз Әлмөхәмәтов исемендәге призына республика йәш йырсылар конкурсы лауреаты (1970)..
- Ағаһы — Сәғитов Азамат Тәлғәт улы, эшҡыуар, Башҡортостан Республикаһының кесе эшҡыуарлыҡты үҫтереү һәм яҡлау фондының генераль директоры.
Иҫкәрмәләр
- ↑ Бывший вице-премьер правительства Башкирии стал врио ректора БГПУ. Ufa.aif.ru (9 ноябрь 2018). Мөрәжәғәт итеү датаһы: 2025-0711.
- ↑ 1 2 Сагитов Салават Талгатович. Башкортостан. Единая Россия. Мөрәжәғәт итеү датаһы: 11 июль 2025.
- ↑ В Башкирии региональное отделение РГО возглавил Салават Сагитов. Башинформ (27 август 2019). Мөрәжәғәт итеү датаһы: 11 июль 2025.
- ↑ Владимир Путин наградил ректора Акмуллинского университета Салавата Сагитова (17 сентябрь 2025). Мөрәжәғәт итеү датаһы: 10 февраль 2026. (рус.)
- ↑ Лейла Аралбаева. Радий Хабиров оценил важность деятельности РГО в Башкирии. ИА «Башинформ» (10 февраль 2026). Мөрәжәғәт итеү датаһы: 10 февраль 2026. (рус.)
