1980 йылғы йәйге Олимпия уйындарында үлән хоккейы (ирҙәр)

1980 йылғы йәйге Олимпия уйындарында үлән хоккейы буйынса ир-егеттәр араһында ярыштар (рус. Хоккей на траве на летних Олимпийских играх 1980 (мужчины)) 1980 йылдың 20—29 июлендә Мәскәүҙә «Динамо» стадионының бәләкәй аренаһында һәм Йәш пионерҙар стадионында уҙа.

Турнирҙа тәүҙә 12 команда уйнарға тейеш була. Улар алдан уҡ ике төркөмгә бүленә. «А» төркөмөндә — Аргентина, Бөйөк Британия, Һиндостан, Кения, Нидерланд һәм Пакистан, «В» төркөмөндә Австралия, Малайзия, Яңы Зеландия, СССР, Испания һәм ГФР командалары уйнарға тейеш була. Был осраҡта һәр төркөмдән иң яҡшы икешәр команда миҙалдар өсөн көрәште ярымфиналда дауам итер ине.

Әммә Аргентина, Кения, Пакистан, Малайзия һәм Германия Федератив Республикаһы Америка Ҡушма Штаттары тарафынан иғлан ителгән бойкот яҡлы була. Австралия, Бөйөк Британия, Нидерланд һәм Яңы Зеландия ҡайһы бер спортсыларға рөхсәт бирә, ләкин уларҙың үлән хоккейы федерациялары турнирҙа ҡатнашыуҙан баш тарта. Һөҙөмтәлә ойоштороу комитеты ҡатнашыусылар һанын алтыға тиклем кәметергә мәжбүр була: аргентиналыларҙы — Куба, кениялыларҙы Танзания алмаштыра һәм 1978 йылғы донъя чемпионатының иң яҡшы командаһы Польша ҡушыла^[1].

Европанан (Испания, Польша, СССР) — өс, Азиянан (Һиндостан), Төньяҡ Американан (Куба), Африканан (Танзания) берешәр йыйылма команда сығыш яһай.

Турнир ике баҫҡыслы система буйынса уҙғарыла. Башта командалар бер-береһе менән уйнай. Һуңынан ике иң яҡшы команда алтын һәм көмөш, өсөнсө һәм дүртенсе — бронза, бишенсе һәм алтынсы — бишенсе урын өсөн көс һынаша.

Чемпион исеменә Һиндостан йыйылма командаһы лайыҡ була, ул һигеҙенсе титул яулай. Улар беренсе этапта 2-се урын ала, ә финалда Испания хоккейсыларын еңә — 4:3. Испания спортсылары Олимпия хоккей турнирҙары тарихында беренсе награда яулай.

Олимпия уйындары дебютантыСССР йыйылмаһы, Польша хоккейсыларының 3—4-се урындары өсөн матчта еңеп, бронза призер була — 2:1.

Турнирҙың иң яҡшы снайперы — 16 туп индергән испанлы Хуан Амат.