Екатеринбург Арена

РФС классификацияһы буйынса стадион «А» төркөмөнөң беренсе категорияһына тура килә^[14]. УЕФА классификацияһы буйынса стадион иң юғары дүртенсе категорияға ҡарай.

Стадион урынында тәүге спорт ҡоролмаһы 1900 йылда барлыҡҡа килә, Екатеринбург сауҙагәре һәм меценат Камалетдин Ағафуров Мәскәү шоссеһы янындағы буш участкала велодром төҙөй^[15]. Екатеринбургта беренсе күп функциялы спорт объектын тантаналы асыу 1900 йылдың 3 (16) сентябрендә була, был көндө велосипед һәм еңел атлетика буйынса ярыш үткәрелә.

Велодромдың асылыуы Екатеринбургта спорттың башҡа төрҙәрен — еңел атлетиканы, гимнастиканы, крокетты, теннисты үҫтереүгә ярҙам итә. 1913 йылда бында футбол буйынса тәүге ярыштар — ҡала беренселеге, шулай уҡ футбол буйынса беренсе Урал чемпионаты үткәрелә^[16].

Екатеринбург ситендәге велодром, XX быуат башы	Велодромда теннис корты, 1913	Екатеринбургтың тәүге футбол командаларының береһе, 1913	Футбол матчы ваҡытында, 1913

Велодром 1925 йылда ябыла, уның урынында В. И. Ленин исемендәге Урал өлкә стадионын проектлау башлана. 1928 йылдың 22 июлендә футбол яланы һәм йүгереү майҙансыҡтары булған стадион тантаналы рәүештә асыла^[17]. Яңы стадиондың ағас трибуналары майҙандың көньяҡ яғында урынлаша һәм 5 мең тамашасыға иҫәпләнә^[17].

1932 йылдың башында эргәләге медицина ҡаласығынын киңәйтеү өсөн стадионды һүтергә уйлайҙар^[17]. Урал өлкә физкультура советы етәкселегендәге бөтә спорт йәмәғәтселеге быға ҡаршы сығыш яһауы һөҙөмтәһендә стадион урынында ҡала.

1950-се йылдар башында ҙурыраҡ стадион төҙөү ихтыяжы тыуа. Иҫке биналарҙы һүтеүҙең рәсми сәбәбе: ағас трибуналар янғын хәүефһеҙлеге талаптарына яуап бирмәй^[17].

Яңы стадиондың проектын Бөтә Союз проектлау институты "Промстройпроект"тың Свердловск филиалы авторҙар командаһы эшләй^[18].Төҙөлөш 1953 йылда башлана һәм 1957 йылдың 26 ​​июнендә тамамлана^[19].

Свердловск үҙәк стадионы файҙаланыуға тапшырылғандан һуң Советтар Союзында иң яҡшы ун спорт объекты иҫәбенә инә^[20].