Фатеева Ольга Викторовна

Фатеева Ольга Викторовна (1981 йылдың 18 марты, Өфө) — 2024 йылда Рәсәй Федерацияһы Президенты указы менән «Герой әсә» исеменә лайыҡ булған күп балалы әсә^[1].

Ольга Фатеева 1981 йылдың 18 мартында Өфө ҡалаһында тыуа^[2]. Благовещен районының Бедеева Поляна ауылында йәшәй, унда 2014 йылда ире Анатолий Бедеев менән күсеп баралар. Ольга үҙенең күсенеүен «төпкөл ауылда кешеләр ғаилә тормошонда тәрән мәғәнәле халыҡ йолаларын һаҡлап ҡалған, бында ата-әсәне, өлкән йәштәгеләрҙе хөрмәт итәләр» тип аңлата^[3]. Ольга һәм Анатолийҙың 11 балаһы — ете улы һәм дүрт ҡыҙы бар. Анатолий билдәләүенсә, улар ғаиләләре ҙур булыр тип планлаштырмаған, әммә, «Аллаһ шул тиклем күп бала биргән икән, беҙ барыһына ла шатбыҙ. Улар барыһы ла көтөп алынған балалар», ти^[4].

2024 йылдың 12 апрелендә Рәсәй Федерацияһы Президенты Владимир Путин Ольга Фатееваға «Ғаилә институтын нығытыуҙағы һәм балалар тәрбиәләүҙәге ҙур ҡаҙаныштары өсөн» «Герой әсә» тигән маҡтаулы исем бирә. Награда бриллианттар һәм илдең эмаль гербы урынлаштырылған алтын йондоҙҙан тора; уға 1 миллион һумлыҡ аҡсалата премия өҫтәлә.

2024 йылдың июлендә Бөрө ҡалаһында Ғаилә, мөхәббәт һәм тоғролоҡ көнөнә (Петр һәм Феврония көнөнә) арналған тантаналы сарала Башҡортостан Республикаһы Башлығы Радий Хәбиров Ольга Фатееваға награда, шулай уҡ ирле-ҡатынлы Фатеевтарға «Ата-әсәлек даны» орденын тапшыра^[3].

Ольга һәм Анатолий балаларына һирәк осраған исемдәр ҡуша: Арсений, Софья, Устинья, Матвей, Елисей, Феодосий, Игнатий, Варвара, Ефросинья, Дмитрий, Валерий.

Бала сағымда, атай-әсәйемдеке кеүек үк, дүрт балам, мотлаҡ улым Арсений һәм ҡыҙым Софья булыр, тип хыяллана инем. Был хыялды тормошҡа ашырғандан һуң исемдәрҙе изгеләр хөрмәтенә бирә башланыҡ. Һәр баланың үҙенең күктәге ҡурсалаусыһы булһын, православие ҡануны буйынса һәр кеме уны хөрмәт итһен тинек.
— Ольга Фатеева^[3].