Олокүл (Өфө)

Өфө — Ырымбур трассаһының 25-се километрында урынлашҡан. Диңгеҙ кимәленән яҡынса 95 метр бейеклектә^[1] Искин ауылының көнсығыш сиге һәм Поляна ҡасабаһы араһында ята. Өфө — Ырымбур трассаһы күлде ике өлөшкә бүлә; көньяҡ өлөшөндә Репище һәм Кесе Репище күлдәре менән тоташа^[6].

Олокүл шулай уҡ Искин күле булараҡ билдәле, Өфө ҡалаһының Киров районы биләмәһендә Өршәк йылғаһының уң яҡ яр буйындағы һыубаҫар туғайҙа урынлашҡан, өлөшләтә Өфө районына инә.

Күл тар һәм оҙон соҡорҙа урынлашҡан, ул формаһы менән Өршәк йылғаһы үҙәнен ҡабатлай. Һыу ятҡылығын атмосфера яуым-төшөмө һәм бер аҙ шишмәләр тулыландыра.

Һыу ятҡылығының көнсығыш өлөшөндә шишмәләр ағып ята, уларҙың береһе күлде Өршәк йылғаһы менән тоташтыра^[7]. Күл уртаһында транспортҡа йөрөүе уңайлыраҡ булһын өсөн дамба төҙөлә, ул ташҡын ваҡытында ваҡыт-ваҡыт һыу аҫтында ҡала^[8][9].

Олокүл ярҙары һөҙәк һәм ныҡ ҡына һаҙлыҡлы. Унда тал, балан, ерек ҡыуаҡтары һәм ағастары өҫтөнлөк иткән һыубаҫар туғайҙар йәйелеп ята.

Көнбайыш ярында Искин ауылы урынлашҡан. Искин урамындағы 27-се йорт эргәһендә урындағы халыҡ яр буйы участкаһын ләм һәм мәтенән таҙартып, рәсми булмаған һыу инеү урыны итеп файҙалана. Көнсығыш яр буйында ял итеү өсөн яраҡлы ҡомло участкалар осрай, әммә уларҙың санитар торошо яҡшынан түгел.

Йылы миҙгелдә яр буйында ҡамыш һәм башҡа һыу үҫемлектәре үҫә, улар һыу ҡоштарының оя ҡороу урыны булып тора. Күлде даими рәүештә селәндәр төйәк итә^[10].

Башҡортостан Республикаһының Милли музейында күл һүрәтләнгән «Олокүл» картинаһы һаҡлана^[11].