Васильев Дмитрий Владимирович (биатлонсы)

Күп кенә совет һәм Рәсәй биатлонсылары кеүек, спорт карьераһын саңғы ярыштарынан башлай, биатлонға осраҡлы рәүештә эләгә. Ленинградтың Невский районының балалар-үҫмерҙәр спорт мәктәбендә күнекмәләр ала, һуңынан 62-се спорт интернатында уҡый (етәксеһе — В. В. Мезенцев). 10-сы класта уҡығанда Мурманскиҙа үткән ярыштарҙа уңышһыҙ сығыш яһай. Саңғысылар менән бергә унда биатлонсылар ярыша, уларҙың береһе Дмитрийҙы атып ҡарарға саҡыра. Ул ятып та, баҫып та сәптәрҙең бөтәһенә лә тиерлек тейҙерә. Ленинградҡа ҡайтҡас, тренерҙарҙан Сухумға биатлонсылар менән күнекмәләргә саҡырыу ала.

Яйлап ул милли команда кимәленә күтәрелә, төрлө ярыштарҙа уңышлы сығыш яһай башлай. «Динамо» спорт йәмғиәте өсөн сығыш яһай (тренеры — Кикот Николай Александрович).

1984 йылда Сараеволағы уйындарҙа команда шәхси ярыштарҙа уңышһыҙ сығыш яһай. Тик һуңғы стартта — эстафетала ғына алтын миҙал яулай алалар.

Калгариҙағы уйындарҙа Васильев эстафетала 1-се этапта йүгерә һәм тағы ла еңәләр.

Васильев-биатлонсы донъя биатлоны тарихына аҡ Олимпиадаларҙа классик (1984) һәм коньки ысулы менән шыуып (1988) еңеү яулаған берҙән-бер биатлонсы булараҡ инә. Ут һыҙығындағы тиҙлеге менән айырылып тора^[1]. Әгәр башҡа спортсылар атыуға 40-45 секунд сарыф итһә, уға 30 етә.

«Почёт Билдәһе» ордены (1984) һәм Халыҡтар Дуҫлығы ордены (1988) менән бүләкләнгән.

1999—2002 йылдарҙа Рәсәй биатлонсылар союзының генераль менеджеры.

2009—2014 йылдарҙа Рәсәй биатлонсылар союзы идараһы ағзаһы.

2011 йылдан Санкт-Петербург биатлон федерацияһы президенты

2012 йылдан — Санкт-Петербург ҡалаһының Калинин районы 3-сө олимпия резервы балалар-үҫмерҙәр спорт мәктәбе директоры.

Халыҡ-ара биатлонсылар союзы (IBU) махсус хәрби операцияға бәйле 2022 йылдың мартында Рәсәй Федерацияһы спортсыларын сит илдәрҙә ярыштарҙан ситләтә. 2024 йылдың декабрендә Дмитрий Васильев халыҡ-ара ярыштарҙы Рәсәй спортсыларынан башҡа уҙғарыу биатлонға пародия булып тора тип белдерә^[2].