М. И. Калинин исемендәге мәҙәниәт йорто

690 һәм 400 урынлыҡ ике тамаша залы, түңәрәктәр өсөн бүлмәләр, шулай уҡ грим бүлмәләре һәм методик кабинеты була. 17 үҙешмәкәр сәнғәт ижад коллективы эшләй^[10].

1933 йылда моторҙар заводының «Ударник» кинотеатры булараҡ типовой проект буйынса конструктивизм стилендә төҙөлә (1932 йылда шул уҡ проекттың «Восток» кинотеатры Силәбелә трактор заводының Социаль ҡаласығындағы ИНОРС торлаҡ кварталында һалынған була^[11][12].

Бөйөк Ватан һуғышы ваҡытында бинала Рыбинск ҡалаһынан эвакуацияланып килгән эшселәр ғаиләләрен беренсел ҡабул итеү буйынса эвакуация пункты ойошторола. 1942 йылдан клуб булараҡ эшләй. Был осорҙа клубтың концертмейстеры вазифаһында Е. О. Вайнтрауб хеҙмәт һала^[13][14]. 1945 йылдың декабрендә СССР Юғары Советына һайлау үткәреүгә әҙерлек йәһәтенән клуб тейешенсә тәртипкә килтерелә, ә 1947 йылда, Октябрь социалистик революцияһының 30 йыллығын ҡаршылау айҡанлы бинаға капиталь ремонт үткәрелә^[2].

1950 йылдарҙа совет неоклассицизмы стилендә яңыртыла: 1953 йылда бинаға төкәтмә яһала һәм 1956 йылға тиклем «Ударник» клубы булараҡ эшләй. Шул уҡ йылда статусын һәм атамаһын «мәҙәниәт йорто» тип үҙгәртеп эшмәкәрлеген яңы йүнәлештә башлай.

1959 йылда Башҡорт АССР-ының дүрт үҙешмәкәр сәнғәт коллективына тәүге тапҡыр «халыҡ театры» исеме бирелә, шуларҙың береһе ошо мәҙәниәт йортоноҡо була^[15]. Дөйөм алғанда, «халыҡ» исеменә төрлө йылдарҙа лайыҡ булғандар: «Раздолье» рус йырҙары хоры, етәксеһе — Башҡортостандың атҡаҙанған мәҙәниәт хеҙмәткәре Л. И. Богатырёва (1943, 1961); башҡорт халыҡ бейеүҙәре ансамбле, етәксеһе — Р. Ф. Йыһанов (1938, 1964); һүрәт төшөрөү студияһы, етәксеһе — А. Ш. Ҡоҙаяров (1949, 1964) һ.б.^[10].

2003 йылда Өфө моторҙар етештереү производство берекмәһе бинаны М. А. Шолохов исемендәге Мәскәү дәүләт гуманитар университетының Өфө филиалына тапшыра^[10]. Бина «Промстрой» яуаплылығы сикләнгән йәмғиәте тарафынан 18 миллион һумға реконструкциялана һәм уҡыу аудиторияһы итеп үҙгәртелә^[16].

2016 йылдың 1 сентябренән бинала ваҡытлыса 51-се урта мәктәп эшләй^[17][18].