Хәмзин Ғәли Ғәббәс улы

1950 йылдың 12 июнендә Башҡорт АССР-ының Белорет районы Ҡоҙғон-Әхмәр ауылында тыуған^[1].

Сермән урта мәктәбен тамамлағандан һуң Белорет һөнәри-техник училищеһында уҡый, армияла хеҙмәт итә. Тыуған яғына ҡайтҡас, шофёр булып эшләй, артабан колхоздың ВЛКСМ комитетының азат ителгән секретары итеп һайлана^[3].

1981 йылда Заһир Исмәғилев исемендәге Өфө дәүләт сәнғәт институтының вокал бүлеген тамамлап, Хөсәйен Әхмәтов исемендәге Башҡорт дәүләт филармонияһы эргәһендәге «Йәдкәр» фольклор ансамбленең солист-вокалисы була.

Ғәли Хәмзин Башҡортостандың музыкаль сәнғәтен сит илдәрҙә — Дания, Испания, Швеция, Австралия, Канада, АҠШ һәм башҡа ерҙәрҙә лайыҡлы күрһәтә. Уның ижади ҡаҙаныштары башҡорт музыкаль сәнғәтенең донъяла танылыуына ҙур өлөш индерә.

АҠШ-тың Миннесота штаты Миннеаполис ҡалаһы халҡы уны ҡаланың Почётлы гражданы итеп һайлай.

2010 йылдың 15 ноябрендә Өфөлә вафат була, тыуған ауылы Ҡоҙғон-Әхмәрҙә ерләнгән^[1].

Йырсы репертуарының нигеҙен башҡорт халыҡ йырҙары тәшкил итә: «Арғужа», «Зәйнулла», «Ҡаһым түрә», «Любизар», «Сибай», «Тафтиләү», «Уралым», «Хәйруллаҡай» һәм «Йүрүҙән», шулай уҡ Башҡортостан композиторҙарының әҫәрҙәре^[1].

1985 йылда «Мелодия» бөтә союз фирмаһы тарафынан йырсы яҙмалары менән «Башҡорт халыҡ йырҙары» винил пластинкаһы (миньон) сығарыла.

• Бөтә Рәсәй халыҡ йыры башҡарыусылар конкурсының беренсе премияһы лауреаты (1985)^[2];
• Ғ. С. Әлмөхәмәтов исемендәге призға республика йәш йырсылар конкурсы лауреаты;
• «Содружество» халыҡ-ара фестивале дипломанты (1993);
• Башҡорт АССР-ының атҡаҙанған артисы (1986);
• Башҡорт АССР-ының халыҡ артисы (1988);
• Салауат Юлаев исемендәге республика премияһы (1997)^[1].

• Улы — Айҙар Хәмзин. Музыкант, композитор^[6];
• Ҡустыһы — Хәлил Хәмзин. Музыкант. Ленин Өфөләге йорт-музейы директоры^[7].

• Белорет ҡалаһының һәм Белорет районының Почётлы гражданы (вафатынан һуң, 2010 йылдың 5 октябрендәге 243-сө ҡарар^[8]).
• 2025 йылдың ноябренән башлап йырсының тыуған ауылы Ҡоҙғон-Әхмәрҙә Ғәли Хәмзин исемендәге Республика вокалистар конкурсы уҙа^[9][10].
• 2020 йылда йырсының тыуыуына 70 йыл тулғанда уның баласаҡ дуҫтары, туғандары тормошона һәм ижадына арналған китап сығара^[11].