Силуанов Антон Германович

Антон Силуанов 1963 йылдың 12 апрелендә Мәскәүҙә профессиональ финансистар Герман Михайлович һәм Янина Николаевна Силуановтарҙың ғаиләһендә тыуған.

1985 йылда Силуанов Мәскәү финанс институтын «финанстар һәм кредит» һөнәре буйынса тамамлай.

1985 йылдың авгусынан 1987 йылдың мартына тиклем «Гипрорыба» ойошмаһында экономист, РСФСР Финанс министрлығында өлкән экономист булып эшләй.

1987 йылдың мартынан 1989 йылдың майына тиклем Совет Армияһында хәрби хеҙмәттә була.

1989 йылдың майынан 1992 йылдың ғинуарына тиклем РСФСР Финанс министрлығында алдынғы экономист, 1-се категориялы экономист, бүлек мөдире урынбаҫары һәм консультант вазифаларын башҡара.

1992 йылдың февралендә Рәсәй Федерацияһы Иҡтисад һәм финанс министрлығының бүлек начальнигы урынбаҫары итеп тәғәйенләнә.

1992 йылдың февраленән 1997 йылдың октябренә тиклем Силуанов Рәсәй Федерацияһы Финанс министрлығының бюджет идаралығында бүлек начальнигы урынбаҫары, бюджет департаменты етәксеһе урынбаҫары вазифаларын башҡара^[1].

1994 йылда Силуанов «Рәсәй Федерацияһы миҫалында баҙар мөнәсәбәттәренә күсеү шарттарында дәүләттең бюджет сәйәсәте» темаһына иҡтисад фәндәре кандидаты ғилми дәрәжәһенә диссертация яҡлай (специальность — 08.00.10 «Финанс, аҡса әйләнеше һәм кредит»)^[2]. 1994 йылда Силуанов «Рәсәй Федерацияһы миҫалында баҙар мөнәсәбәттәренә күсеү шарттарында дәүләттең бюджет сәйәсәте» темаһына иҡтисад фәндәре кандидаты ғилми дәрәжәһенә диссертация яҡлай (белгеслек: 08.00.10 «Финанс, аҡса әйләнеше һәм кредит»)^[3].

1997 йылдың октябренән 2003 йылдың июленә тиклем Рәсәй Федерацияһы Финанс министрлығының макроиҡтисад сәйәсәте һәм банк эшмәкәрлеге департаменты етәксеһе була.

2001 йылдың 22 мартында Рәсәй Федерацияһы Финанс министрлығы коллегияһы ағзаһы итеп һайлана.

2003 йылдың июленән 2004 йылдың майына тиклем Рәсәй Федерацияһы Финанс министрлығы министры урынбаҫары вазифаһын башҡара.

2004 йылдың майынан 2005 йылдың 12 декабренә тиклем — Рәсәй Федерацияһы Финанс министрлығының бюджет-ара мөнәсәбәттәр департаменты директоры.

2005 йылдың 12 декабренән — Рәсәй Федерацияһы Финанс министрлығының министр урынбаҫары.

2011 йылдың 27 сентябренән — Рәсәй Федерацияһы Финанс министрлығының министр вазифаһын ваҡытлыса башҡарыусы.

2011 йылдың 16 декабрендә Силуанов Рәсәй Федерацияһы финанс министры итеп тәғәйенләнә^[4] һәм Рәсәй Федерацияһы Именлек Советы составына индерелә^[5].

2012 йылда Силуанов «Рәсәйҙә федерализм үҫеше шарттарында бюджет-ара мөнәсәбәттәр» темаһына (08.00.10 — «Финанстар, аҡса әйләнеше һәм кредит») докторлыҡ диссертацияһын яҡлай. Рәсми оппоненттары — иҡтисад фәндәре докторы, профессор А. А. Аганбегян, иҡтисад фәндәре докторы С. Г. Синельников-Мурылёв һәм иҡтисад фәндәре докторы, профессор Л. Н. Лыкова.^[6].

2013 йылдың ғинуарынан — Рәсәй Хөкүмәте ҡарамағындағы Финанс университетының финанс-иҡтисад факультеты деканы.

2015 йылдың ғинуарында Силуанов РФ хөкүмәте тарафынан Рәсәй Һаҡлыҡ банкының күҙәтеү советы ағзаһы вазифаһына тәҡдим ителә^[7].

2016 йылдың февралендә «Берҙәм Рәсәй» партияһының юғары советынан китә (2012 йылдан ағза булып тора).

2017 йылдың апрелендә Силуанов ВТБ банкының күҙәтеү советы рәйесе итеп тәғәйенләнә^[8].

2018 йылдың 18 майында Рәсәй Президенты Владимир Путин Рәсәй Федерацияһы Хөкүмәте Рәйесенең беренсе урынбаҫары — финанс министры итеп тәғәйенләй^[9].

2020 йылдың ғинуарында, Дмитрий Медведев етәкселегендәге хөкүмәттең отставкаһынан һуң, вице-премьер вазифаһынан китә^[10], әммә финанс министры вазифаһында ҡала.

2024 йылдың 14 майында Дәүләт Думаһы тарафынан Рәсәй финанс министры вазифаһына ҡабат раҫлана^[11], шул уҡ көндө Рәсәй Президенты был тәғәйенләүҙе раҫлай^[12].

2018 йылда Силуанов Рәсәйҙә пенсион йәшен арттырыу тураһында закон ҡабул итеүҙең төп яҡлаусыларҙың береһе булды. Был ҡарар |граждандарҙың киң ҡәнәғәтһеҙлеген тыуҙырҙы, был эш футбол буйынса донъя чемпионаты (ЧМ) фонында тиҙ арала тәҡдим ителеүе менән көсәйҙе. Силуановтың реформаның башланыуы менән донъя чемпионатына тап килеүе «осраҡлы» булыуы, уның киң йәмәғәтселек тарафынан «тикшерелеүе» һәм һуңынан халыҡтың пенсион системаһындағы үҙгәрештәргә ауыр реакцияһы «көтөлмәгән» булыуы хаҡында белдереүе күптәрҙең аптырашта ҡалдырҙы^[13].

Рәсәй Федерацияһының финанс министры булараҡ, Силуанов Мәскәү — Ҡазан тиҙ йөрөшлө тимер юл магистрале төҙөү проектының төп тәнҡитсеһе һәм тотҡарлаусыһы булып тора^[14][15].

2019 йылдың апрелендә Силуанов мәктәптәрҙә шәхси бизнес асыуҙы пропагандалау курсын индереү теләге тураһында белдерҙе^[16].

2019 йылда Силуанов ВТБ башлығы Андрей Костиндың аҙ килемле граждандар һәм кесе һәм урта эшҡыуарлыҡ өсөн һалымдарҙы кәметеү тәҡдимен ҡәтғи кире ҡаҡты^[17].

2020 йылда Силуанов Рәсәйҙә хеҙмәткә һалымдың үтә юғары булыуын әйтте. Рәсәйҙә эш биреүсе хеҙмәткәр өсөн эш хаҡының 30 % күләмендә страховка иғәнәләре түләй. Шул иҫәптән, 22 % — Рәсәй Федерацияһының Пенсия фонды, 5,1 % — Медицина страховкаһына, 2,9 % — социаль страховкаға. Шулай уҡ хеҙмәткәрҙең эш хаҡынан 13 % физик шәхестәрҙең килеменә һалым тотола. Был кимәлдәге һалымдар «конвертта эш хаҡы» алыуҙың юғары кимәлдә булыуына килтерә, ул бөтә эске тулайым продукттың 13 % тәшкил итә. Рәсәйҙә хеҙмәткә дөйөм һалым ставкаһы уртаса предприятиеларҙың коммерция килеменең 36,6 % тәшкил итә. Сағыштырыу өсөн, Ҡаҙағстанда хеҙмәткә һалым ставкаһы 10,1 %, АҠШ-та — 9,8 %, Канадала — 12,7 %, Германияла — 21,5 %, Бөйөк Британияла — 12 %. Рәсәй хөкүмәтенең һалымдарҙы кәметергә теләмәүен Финанс министры Силуанов федераль бюджетты балансһыҙландырыуҙан һәм РФ Пенсия фонды бөлгөнлөккә төшөү перспективаһынан ҡурҡыу менән аңлата^[18].

Атаһы — Герман Михайлович Силуанов (25.02.1937 йылда тыуған), 1961 йылда Мәскәү дәүләт иҡтисад институтының «Финанстар» факультетын тамамлаған. Уҡыу йылдары ваҡытында факультеттың комсомол ойошмаһы секретары урынбаҫары булған. Герман институтты тамамлағас, Мәскәүҙә ҡалдырылған өс студентының береһе булған, уны СССР-ҙың КГБ-һына йүнәлткәндәр. Ул унда оҙаҡ эшләмәгән һәм факультет деканы Раиса Васильевна Гужкова ярҙамында уны СССР Финанстар министрлығының сәнәғәтте финанслау идаралығына, уның ире Иван Васильевич Гужков етәкселегенә күсергәндәр. Герман комсомол активисы, Минфиндың стенгазетаһы редколлегияһы ағзаһы булған^[19]. 1991 йылда РСФСР Финанстар министрлығы бүлеге начальнигы булған^[1], 1996 йылда РФ Финанстар министрлығының кредит һәм аҡса әйләнеше департаменты етәксеһе урынбаҫары булған, шунан пенсияға сыҡҡан. Тиҙҙән был департаментты макроиҡтисад өлкәһендәге сәйәсәт менән шөғөлләнгән икенсеһе менән берләштергәндәр, һөҙөмтәлә макроиҡтисад һәм банктар департаменты барлыҡҡа килгән, уны Антон Силуанов етәкләгән.

Әсәһе — Янина Николаевна Силуанова (20 ғинуар 1936 йылда тыуған), «Финансы и статистика» нәшриәтендә эшләгән, һуңынан Дәүләт финанс университетының редакция-нәшриәт бүлеге хеҙмәткәре булған. Антон Силуановтың 1976 йылдың 18 февралендә тыуған Всеволод исемле ҡустыһы бар, ул шулай уҡ РФ Финанстар министрлығы хеҙмәткәре^[20][21].

Өйләнгән, әммә 2016 йылда Силуановтың килемдәре тураһында декларацияһынан ҡатыны тураһында мәғлүмәт юғалған^[22].

Улы Глеб (1999 йылда тыуған), РФ Хөкүмәте ҡарамағындағы Финанс университеты студенты, Йәш сәйәсмәндәр мәктәбе сығарылыш уҡыусыһы, байкер^[20][21][23].

Улы Алексей. 2023 йылдан алып «Аэрофлот» компанияһының төбәк үҫеше департаменты етәксеһе^[24].

Антон Силуанов мотоциклда йөрөргә һәм һыу аҫты һунары менән шөғөлләнергә ярата, грампластинкалар коллекцияһы йыя. Немец телен белә^[21].

Facebook менән Instagram-да аккаунттары булған, әммә уларҙы псевдоним менән теркәлгән: «Үҙем яҙмайым, дуҫтарым унда кәм тигәндә-тиҫтәнән артыҡ түгел. Социаль селтәрҙәрҙә миңә ваҡиғалар тураһында фекер алышыуҙар, ҡулланыусыларҙың комментарийҙары ҡыҙыҡлы».

• «Ватан алдындағы ҡаҙаныштары өсөн» ордены III дәрәжә (2013 йылдың 15 апреле) — дәүләт финанс сәйәсәтен тормошҡа ашырыуға ҙур өлөш индергәне һәм күп йыллыҡ намыҫлы хеҙмәте өсөн^[25].
• «Ватан алдындағы ҡаҙаныштары өсөн» IV дәрәжә ордены (2011 йылдың 2 феврале) — хеҙмәт уңыштары һәм күп йыллыҡ намыҫлы хеҙмәте өсөн^[26].
• «Ватан алдындағы ҡаҙаныштары өсөн» ордены миҙалы I дәрәжә (2007 йылдың 13 апреле) — иҡтисад һәм финанс эшмәкәрлек өлкәһендәге ҡаҙаныштары өсөн^[27].
• Рәсәй Федерацияһы Президентының Почет грамотаһы (2010 йылдың 18 ноябре) — электрон мәғлүмәт йөрөтөүсеһе булған сит ил паспорттарын ҡулланыуға индереүҙе ваҡытында тәьмин иткән өсөн^[28].
• Рәсәй Федерацияһы Президентының рәхмәт хаты (2012 йылдың 1 сентябре) — иҡтисад, финанс эшмәкәрлеге өлкәһендәге ҡаҙаныштары һәм күп йыллыҡ намыҫлы хеҙмәте өсөн^[29].
• Рәсәй Президентының рәхмәт хаты (2002 йылдың 6 сентябре) — иҡтисад һәм финанс эшмәкәрлек өлкәһендәге ҡаҙаныштары өсөн^[30].
• Рәсәй Федерацияһы Финанс министрлығының Почет грамотаһы (2001 йыл).
• Рәсәй Федерацияһы Финанс министрының рәхмәте (2002 йыл).
• «Поляр йондоҙо» ордены (Яҡутия)^[31].
• «Дуҫлыҡ» ордены (Татарстан, 2015 йыл)^[32].
• «Чечен Республикаһы алдындағы ҡаҙаныштары өсөн» миҙалы (2008 йылдың 24 ноябре) — Чечен Республикаһында дәүләт финанс сәйәсәтен тормошҡа ашырыуға ҙур өлөш индергәне өсөн^[33].
• «Карелия Республикаһы алдындағы ҡаҙаныштары өсөн» миҙалы (2020 йылдың 8 июне) — Республика Карелия һәм уның халҡы алдындағы ҡаҙаныштары, республиканың социаль-иҡтисади үҫешенә ҙур өлөш индергәне һәм Карелия Республикаһының ойошторолоуына 100 йыл тулыуға әҙерлек буйынса дәүләт комиссияһы составындағы әүҙем эшмәкәрлеге өсөн^[34].