Трутнев Юрий Петрович

Юрий Петрович Трутнев 1956 йылдың 1 мартында Молотов өлкәһенең Добрянск районы Полазна ҡасабаһында (хәҙер Пермь ҡалаһы сите)^[7], нефтселәр ғаиләһендә тыуа^[8].

1978 йылда Пермь политехник университетының тау факультетын «тау инженеры» һөнәре буйынса тамамлай. Уҡыу ваҡытында һөнәре буйынса «Полазнанефть» һәм «Коминефть» нефть-газ табыу участкаһында быраулаусы ярҙамсыһы, нефть һәм газ табыу буйынса оператор булып эшләй.

Институтты тамамлағандан һуң Пермь фәнни-тикшеренеү һәм нефть сәнәғәте проект институтына йүнәлтелә, унда кесе ғилми хеҙмәткәр булып эшләй^[9].

1981—1986 йылдарҙа комсомол эшендә була. ВЛКСМ-дың Пермь ҡала комитетында инструктор булып эшләй.

1986—1988 йылдарҙа Пермь өлкә башҡарма комитетының Спорт эштәре буйынса комитетын етәкләй.

1988 йылда партнерҙары менән бергә спорт тренажёрҙары эшләү менән шөғөлләнгән «Контакт» кооперативын ойоштора; тренажёрҙар, нигеҙҙә, төрлө дәүләт ойошмаларына һатыла^[8]. 1990 йылда кооператив базаһында ойошторолған «ЭКС ЛИМИТЕД» компанияһын етәкләй. 1996 йылда — «Э. К. С. Интернешнл» акционерҙар ойошмаһы президенты. Тренажёрҙар һатыуҙан тыш, Трутнев физкультурниктар бригадаһында баһадирҙар гастролдәрен ойоштороу, сит ил автомобилдәре һатыу, ул ваҡытта Рәсәй Федерацияһының Швейцариялағы сауҙа вәкиллегендә эшләгән Олег Чиркунов менән бергә «Nestlé» шоколадын килтереү менән шөғөлләнә. Чиркунов Пермгә ҡатҡас, партнёрҙар берлектә «Семья» супермаркеттар селтәрен ойоштора^[7][8].

1994 йылда Пермь өлкәһенең һәм Пермь ҡала думаһының Закондар сығарыу йыйылышы депутаты итеп һайлана, унда Иҡтисад сәйәсәте һәм һалым буйынса комитетты етәкләй^[8].

1996 йылдың декабрендә һайлаусыларҙың 61 процент тауышын йыйып, Пермь ҡалаһы мэры итеп һайлана.

2000 йылдың декабрендә Пермь өлкәһе губернаторы итеп һайлана^[10]. Тауыш биреүҙең беренсе турында 51 процент тауыш йыйып, ғәмәлдәге губернатор Геннадий Игумновта еңә. Матбуғат баҫмалары хәбәр итеүенсә, уны эшҡыуарҙар, шул иҫәптән Дмитрий Рыболовлев менән Андрей Кузяев ярҙам итә^[8]. Трутнев губернатор булған осорҙа Рәсәйҙә төбәктәрҙе эреләтеү — Пермь өлкәһе менән Коми-Пермяк автономиялы округын ҡушыу процесы башлана, ә 2003 йылдың 7 декабрендә берләшеү буйынса референдум уңышлы үткәрелә.

2003 йылдың 24 майынан 19 декабренә тиклем Трутнев — Рәсәй Федерацияһы Дәүләт советы президиумы ағзаһы^[11][12].

2004 йылдың 9 мартынан Рәсәй Федерацияһы Президенты Указы менән Михаил Фрадков хөкүмәтендә тәбиғәт ресурстары министры итеп тәғәйенләнә. 2004 йылдың майында, Владимир Путин вазифаһына икенсе тапҡыр һайланғандан һуң, вазифаһына ҡабаттан раҫлана.

2012 йылдың 22 майында Рәсәй Федерацияһы Президенты ярҙамсыһы итеп тәғәйенләнә. Уның бурысы — Дәүләт советына кураторлыҡ итеү була. VI саҡырылыш Дәүләт Думаһы депутаты мандатын миллиардер Анатолий Ломакинға тапшыра^[13].

2013 йылдың 31 авгусында Рәсәй Федерацияһы Хөкүмәте рәйесе урынбаҫары — РФ Президентының Алыҫ көнсығыш федераль округындағы тулы хоҡуҡлы вәкиле итеп тәғәйенләнә^[14]. Рәсәй Федерацияһының яңы хөкүмәте формалаштырылғанда: 2018 йылдың 18 майында һәм 2020 йылдың 21 ғинуарында вазифаһына ҡайтанан тәғәйенләнә^[15].

2018 йылдың декабренән — Арктиканы үҫтереү мәсьәләләре буйынса дәүләт комиссияһы рйесе^[16][17].

2024 йылдың 13 майынан Дәүләт Думаһы премьер-министр Михаил Мишустин индергән хөкүмәт рәйесе ағзалары исемлеген раҫлай. Трутнев яңы кабинетта вице-премьер, Алыҫ Көнсығыш федераль округында РФ Президентының Тулы хоҡуҡлы вәкиле вазифаһын һаҡлап ҡала^[18][19]. Шулай уҡ ул Магадан өлкәһендә, Сахалин өлкәһенең Көньяҡ Курил, Курил, Төньяҡ Курил ҡала округтары территорияларындағы өҫтөнлөклө территориялар һәм социаль-иҡтисади уҙымлы үҫеш территорияларының социаль-иҡтисади үҫеше өсөн яуаплы була^[20].

Өйләнгән, өс ул, ике ҡыҙ атаһы. Улы Дмитрий (1982) — Үҙәк кооператив банкының директорҙар советы ағзаһы һәм финанс советнигы^[21].

Спорт — көнсығыш алыштары (каратэ Кёкусинкай), автоуҙыштар (классик ралли) менән етди шөғөлләнә.

Халыҡ-ара кёкусинкай ИКО ойошмаһының (2005) каратэ кёкусинкай буйынса 5-се һәм 6-го дана Халыҡ-ара кёкусинкай ойошмаһының 6-сы данына (2018 йыл 1 март) эйә^[22][23].

2005 йылда ойошторолғандан алып — Рәсәй хәрби алыш сәнғәте берлеге рәйестәше (С. В. Кириенко менән)^[4][24][25]. 2004 йылда ойошторолғандан алып — Рәсәйҙең кёкусинкай ассоциацияһы президиумы рәйесе^[5][26]. 2011 йылда ойошторолғандан алып — Бөтә донъя кёкусин берлеге рәйшстәше^[6][27][28]. Берлекте ойоштороу инициаторҙарының береһе була.

2000—2004 йылдарҙа даими рәүештә Mitsubishi Lancer Evolution автомобилдәрендә авторалли буйынса Рәсәй чемпионаты һәм кубогы этаптарында ҡатнаша^[3].

• IV дәрәжә «Ватан алдындағы ҡаҙаныштары өсөн» ордены (2 март 2016)^[29].
• Почёт ордены (8 июнь 1998)^[30].
• Рәсәй Федерацияһы Хөкүмәтенең Почёт грамотаһы (1 март 2006)^[31].
• I дәрәжә П. А. Столыпин миҙалы (23 март 2016)^[32].
• II дәрәжә П. А. Столыпин миҙалы (1 март 2011)^[33].
• Почёт ордены (Көньяҡ Осетия, 1 июнь 2009)^[34].