Рәсәй почтаһы көнө

Рәсәйҙә дәүләт даими почта бәйләнеше Бөйөк Пётр реформаларынан башланғыс ала. 1693 йылда, Архангельсктың тәүге Рәсәй караптар төҙөү верфеһе (рус.)баш. һалынған саҡта, Пётр I Мәскәү — Переславль-Залесский — Ростов Великий — Ярославль — Вологда — Архангельск маршруты буйынса эске почта линияһын ойоштороу тураһында указ сығара. Указда почта ташыу шарттары, йәм (ҡунаҡ йорттары) йыһазландырылыуы, почта ебәрелмәләрен һаҡлау буйынса яуаплылыҡ, ямщиктарҙың кейем формаһы, кадрҙарҙы һайлап алыу тәртибе, шулай уҡ юлдар төҙөү һәм уларҙы тотоу буйынса бурыстар көйләнде.

Пётр I Рәсәйҙә тәүге эске почта линияһын булдырғандан көндән 300 йыл үткәс, почтаның Рәсәй дәүләтенең тарихи үҫешендәге ролен иҫәпкә алып, 1994 йылдың 16 майындағы Рәсәй Президентының 944-се һанлы «Рәсәй почтаһы көнө тураһында» Указы^[1] менән Рәсәй почтаһы көнө һөнәри байрам көнө булдырҙы. Билдәләү көнө июлдең икенсе йәкшәмбеһе тип билдәләнде. Рәсәйҙә почта көнө йыл һайын, 1994 йылдан билдәләнә; 2026 йылда байрам 12 июлгә тура килә.

Был көн мәғлүмәт тапшырыуҙа, ил эсендә элемтә булдырыуҙа почта хеҙмәтенең мөһимлеген билдәләй. 2002 йылда берҙәм предприятие — «Рәсәй почтаһы» федераль дәүләт унитар предприятиеһы ойошторола. 2003 йылда бөтә федераль почта элемтәһе ойошмаларын берләштерә. 2013 йылдан Рәсәй Федерацияһының стратегик предприятиелары исемлегенә индерелә, ә 2019 йылда «Рәсәй почтаһы» акционерҙар йәмғиәте итеп үҙгәртеп ҡорола.

Рәсәй почтаһы көнөн почта хеҙмәте менән шөғөлләнгән һәр кем билдәләй: почта ташыусылар, почта операторҙары, келәт һәм сорттарға айырыу үҙәге хеҙмәткәрҙәре, почта таратыу үҙәге хеҙмәткәрҙәре, шулай уҡ филиал һәм транспорт хеҙмәте хеҙмәткәрҙәре. Байрам алдынан традицион рәүештә бүлектәр араһында күп һанлы категориялар буйынса һөнәри ярыштар үткәрелә; иң абруйлыларының береһе — «Транспорт һәм логистика»^[2]. Еңеүселәргә ҡиммәтле бүләктәр һәм наградалар тапшырыла.

Рәсәй Федерацияһының Һанлы үҫеш, элемтә һәм киң мәғлүмәт саралары министрлығының (рус.)баш. юғары вазифалы кешеләре ҡотлау мөрәжәғәттәре менән сығыш яһай, почта тармағының ҡаҙаныштарын һәм үҫеш перспективаларын билдәләй. Был көндө шулай уҡ төрлө саралар, шул иҫәптән концерттар һәм мәҙәни саралар үткәрелә^[3]. Абруйлы хеҙмәткәрҙәргә почёт грамоталары, рәхмәт хаттары тапшырыла.

Байрамда яңы технологиялар һәм эш алымдары тураһында фекер алышыуҙа конференциялар, семинарҙар, уҡыуҙар үткәрелә. Шулай уҡ винтаж маркалар күргәҙмәләре, башҡа мәҙәни саралар ойошторола. Байрам хөрмәтенә коллекцион маркалар сығарыла, хәйриә саралары үткәрелә^[4].

2001 йылда Рәсәй почтаһы көнөн билдәләү өсөн Рәсәй почтаһы биҙәкле штамплы конверт сығарҙы. Конвертҡа, почта хеҙмәте түләнгәнен аңлатҡан, «А» хәрефле марка баҫылған. Артабан бындай конверттар йыл һайын сығарыла.