Буранғолов Мөхәмәтша Абдрахман улы

1888 йылдың 15 декабрендә Һамар губернаһы Быҙаулыҡ өйәҙе Йомран-Табын улусының (хәҙерге Ырымбур өлкәһе Красногвардейск районы) Үрге Ильяс ауылында тыуған. 1900 йылда етем ҡалып, ағаһы тәрбиәһендә үҫә. Күрше Яңы Юлдаш ауылында земство мәктәбендә уҡый.

1901 йылдан йәйҙәрҙә Ырымбурҙа сәйханала (1903, 1904 һәм 1905 йылдарҙа Аҡтүбәлә тирмәндә) эшләй, ә ҡышын Ҡарғалы ауылы (Сәйет биҫтәһе) 7-се йәмиғ мәсете ҡарамағындағы мәҙрәсәлә (мөҙәрисе Ғәликәев) уҡый^[1].

1906 йылда Аҡтүбә өйәҙенең ҡаҙаҡ халҡы араһында мөғәллимлек итә. 1907, 1907, 1908 йылдарҙа башҡорттар араһында өҫтәмә йән иҫәбен алыу барышында Башҡортостан буйлап тәржемәсе булып йөрөй.

1905 йылдан халыҡ ижады ынйыларын — башҡорт фольклорын йыйыу эшенә тотона: башҡорт халыҡ йырҙары («Ашҡаҙар», «Буранбай», «Зөлхизә» һ.б.) һәм уларҙың легендалары, эпостар («Урал батыр», «Аҡбуҙат», «Иҙеүкәй менән Мораҙым», һ.б.), туй йолалары башҡорт фольклорының алтын фондын тәшкил итә^[2]. 1907 йылда Һамар губернаһы Быҙаулыҡ өйәҙе (хәҙерге Ырымбур өлкәһе Красногвардейский районы) Үрге Ильяс ауылында йәшәүсе Хәсән Буранғоловтан башҡорт ауыҙ-тел ижады ҡомартҡыһы «Ҡара юрға» эпосын яҙып ала.

1910—1911 йылдарҙа Ырымбур ҡалаһында «Хөсәйениә» мәҙрәсәһендә белем ала^[3].

1912—1916 йылдарҙа Ҡайыпҡол мәктәбендә уҡыта, 1916—1918 йылдарҙа — Быҙаулыҡ ҡалаһындағы халыҡ мәғарифы бүлегендә эшләй^[1].

1917 йылдың декабрендә Ырымбурҙа уҙған III Бөтә башҡорт ойоштороу ҡоролтайында ҡатнаша. 1917 йылдан — Башҡортостан мөхтәриәтенең Туҡ-Соран кантоны халыҡ мәғарифы бүлеге мөдире. 1918 йылдың февралендә Башҡорт Хөкүмәте һәм Башҡорт мәркәз шураһы ағзалары Ырымбур ревкомы тарафынан ҡулға алынғас, Байтурин менән берлектә ревком рәйесе С. Цвиллинг менән һөйләшеүҙәр алып барырға ебәрелә. 1918 йылдың октяренән — Туҡ-Соран кантоны башҡарма комитеты рәйесе^[1].

1919 йылдың мартынан — Башҡортостан АССР-ының Туҡ-Соран кантоны революцион комитеты рәйесе. 1919 йылдың майынан РКП(б) ағзаһы. 1919 йылдың майында М. Буранғолов һәм уның урынбаҫары А. Ильясов большевиктар тарафынан ҡулға алына. Туҡ-Соран кантонында хәлде көйләр өсөн Башревком вәкилдәре советы ағзаһы И. Мутин ебәрелә, ул килгәс ҡулға алынғандар иреккә сығарыла. 1919 йылдың 6-8 июлендә Әхмәр ауылында уҙған Туҡ-Соран кантоны Советтарының I съезында Туҡ-Соран кантоны башҡарма комитеты рәйесе итеп һайлана. 1919 йылдың 15 сентябрендә ВКП(б)-ның Туҡ-Соран кантон комитеты рәйесе итеп һайлана.^[1].

1921 йылдан тыуған ауылында уҡытыусы булып эшләй^[2]. 1922 йылда Башҡортостан АССР-ының Мәғариф халыҡ комиссариатының фәнни бүлеге ҡарамағында Башҡортостан көнкүрешен, мәҙәниәтен һәм тарихын өйрәнеү буйынса йәмғиәт ағзаһы итеп һайлана^[4].

1924—1937 йылдарҙа Башҡортостан АССР-ының Стәрлетамаҡ, Өфө, Мәләүез, Йоматау һәм Әлшәй (Раевка) мәктәптәре һәм техникумдарында башҡорт теле һәм әҙәбиәтен уҡыта. 1935—1937 йылдарҙа К. А. Тимирязев исемендәге Башҡорт педагогия институтында уҡый^[2].

1937 йылдың 23 декабрендә «буржуаз милләтселектә» ғәйепләнеп ҡулға алына, төрмәгә ябыла. 1938 йылдың 29 июлендә иреккә сығарыла^[1].

1938 йылдың 1 сентябренән Өфөләге Башҡортостан тел һәм әҙәбиәт ғилми-тикшеренеү институтында эшләй башлай. Унда фольклор бүлегендә эш алып бара^[1].

Башҡорт халыҡ ижадына нигеҙләнеп бик күп пьесалар, драмалар яҙа. Улар театр сәхнәләренән күрһәтелә килә.

1940 йылдың 25 февраленән Яҙыусылар союзы ағзаһы. 1944 йылда «Башҡортостандың халыҡ сәсәне» тигән маҡтаулы исем бирелә^[2].

ВКП(б) Үҙәк Комитетының 1945 йылдың 27 ғинуарында «Башҡорт партия ойошмаһында агитация һәм пропаганда эшенең торошо һәм уны яҡшыртыу саралары тураһында» ҡарары ҡабул ителгәндән һуң, Мөхәмәтша Буранғолов яңынан эҙәрлекләүҙәргә дусар була: уны һәм Баязит Бикбайҙы әҫәрҙәрендә башҡорттарҙың тарихын дөрөҫ күрһәтмәүҙә ғәйепләйҙәр. 1950 йылда милләтселектә ғәйепләнеп репрессиялана, 1950—1956 йылдарҙа һөргөндә була.

1959 йылдың 30 октябрендә Башҡорт АССР-ының Юғары Суды тарафынан аҡлана. 1960 йылда СССР-ҙың Әҙәби фондында һәм Яҙыусылар союзында ағзалығы тергеҙелә, әммә уның әҫәрҙәре тыйыу аҫтында ҡала. Үҙ әҫәрҙәрен һуңғы тапҡыр аҡларға маташып, 1962 йылда КПСС-тың Үҙәк Комитеты секретары М. А. Сусловҡа хат яҙа. Әммә уның әҫәрҙәренә тыйыу тик 1990 йылдарҙа ғына алына^[1].

1966 йылдың 9 мартында Өфөлә вафат була.

• Ашҡаҙар: Пьеса. — Ырымбур, 1923. — 30 с.
• Башҡорт туйы: Пьеса. — Өфө: Башиздат, 1929. — 112 с.
• Прокурор: Пьеса. — Өфө: Башгиз, 1930. — 42 с.
• Башҡорт йырҙары һәм ҡобайырҙары. — Өфө, 1940. — 122 с.
• Буранғол М. Ватан һуғышы. — Өфө: Башгосиздат, 1942. — 36 с.
• Батырҙар тураһында эпостар. — Өфө: Башгосиздат, 1943. — 200 с.
• Аҡбуҙат: Башҡорт халыҡ героик эпосы. — Өфө: Башҡортостан китап нәшриәте, 1971. — 46 с.
• Аҡбузат: Башкирский народный героический эпос (рус.). — Уфа: Башкирское книжное издательство, 1972. — 46 с.; Аҡбузат: Башкирский народный героический эпос (рус.). — Уфа: Башкирское книжное издательство, 1976. — 12 с.
• Буранғолов Мөхәммәтша. Таштуғай: пьесалар. — Өфө: Китап, 1994. — 496 с.
• Буранғолов Мөхәммәтша. Сәсән аманаты: халыҡ ижады һәм ижадсылар тураһында, туй йолалары, боронғо йырҙар һәм легендалар, ҡобайырҙар. — Өфө: Китап, 1995. — 352 с.
• Көйһөҙ ҡыҙ. Яралы бөркөт. — Өфө: Китап, 1999.
• Һайланма әҫәрҙәр. — Өфө, 2008.

Мәҡәләләре

• Буранғолов М. Ашҡаҙар = [Ашкадар]: йыр һәм уның тарихы // Шура : журнал. — Өфө, 1915. — № 13. — С. 413–415.
• Буранғолов М. Чоран вә Туҡ буйы башҡортлары // Ваҡыт : гәзит. — Өфө, 1915. — № 1689. — С. 2.
• Буранғолов Мөхәмәтша. Ватан һуғышы: (ҡобайырҙан өҙөк) // Судьба земли, дыхание времени = Ил язмышы, заман һулышы : йыйынтыҡ. — Өфө: Китап, 2009. — С. 96–97.

• Әлшәй районының Раевка ауылындағы башҡорт лицейына Мөхәммәтша Буранғолов исеме бирелгән^[5].
• Раевка ауылындағы башҡорт лицейы баҡсаһында һәм Башҡорт дәүләт университетының Сибай институты территорияһында Мөхәммәтша Буранғоловҡа бюст ҡуйылған.
• Мәләүез, Сибай ҡалаларындағы урамдар уның исемен йөрөтә.
• Өфөлә Мөхәмәтша Буранғолов йәшәгән йортҡа мемориаль таҡтаташ ҡуйылған.
• 2012 йылда Башҡортостан Республикаһы Яҙыусылар союзы уның исемендәге премия булдырған.