Юлдашев Роберт Нәжип улы

Роберт Юлдашев 1971 йылдың 9 июлендә Өфө ҡалаһында, Башҡорт АССР-ында тыуған. 2000 йылда Заһир Исмәғилев исемендәге Өфө дәүләт сәнғәт институтын тамамлаған (Айрат Ҡобағошов класы).

Бала сағынан спорт менән шөғөлләнеп, «Салауат Юлаев» хоккей клубының балалар командаһы составында ҡатнаша^[1]

1989 йылдан башлап Өфө дәүләт сәнғәт институтының урта махсус музыка мәктәбе уҡытыусыһы була. 1991 йылда «Аҡйондоҙ» музыка төркөмөндә сығыш яһай башлай. 1995—1998 һәм 2001—2003 йылдарҙа Фәйзи Ғәскәров исемендәге дәүләт академия халыҡ бейеүҙәре ансамбле музыканты булып эшләгән.

2009 йылдан Роберт Юлдашев «Ҡурайсы» төбәк-ара йәмәғәт ойошмаһы һәм «Ҡурайсы» этно-төркөмө етәксеһе була.

Роберт башҡарыуында ҡурай моңо Англия («Роял фестиваль холл»), Япония һәм башҡа илдәрҙә яңғыраны. Башҡортостан милли симфоник оркестры менән Испанияла, «Кремлёвский балет» труппаһы менән Бельгия, Люксембург, Голландия гастролдәрҙә булды һәм был илдәр тамашасыларын уйнауы менән әсир итте. Талантлы музыкант шулай уҡ Берлин, Кипр һәм Италияның Милан ҡалаһындағы «Ла Скала» сәхнәләрендә ҙур уңыш ҡаҙанды.

Ҡурайсы Владимир Спиваков етәкселегендәге «Виртуозы Москвы» оркестры менән берлектә «Путь», «Дом солнца» фильмдарына музыка яҙыуҙа ҡатнаша. Гарик Сукачев^[2], Николай Носков, «Пелагея» кеүек Рәсәй эстрада йондоҙҙары менән сығыш яһау Роберт Юлдашев һәм ҡурайға киң танылыу алып килде.

• «Уфимская волна-2014» конкурсының жюри ағзаһы^[3].
• Башҡортостан юлдаш телевидениеһы ойошторған башҡорт бейеүе бәйгеһе "Байыҡ"тың баһалама ағзаһы (2013)^[4]
• Үҙенең «Ҡурайсы» этно-төркөмө менән 2025 йылда киң күләмле «Ел көйө» музыка һәм бейеү фестивален ойоштора, ул 7-9 февралдә «Башҡортостан» дәүләт концерт залында^[5] һәм 7-9 августа Торатау итәгендә үтә^[6].

• 2016 йыл, сентябрь: «Russian World Music Awards» премияһына дәғәүәселәр араһында Роберт Юлдашевтың «Ҡурайсы» этно-төркөмө тамашасыларҙың тауыш биреүе һөҙөмтәһендә еңеүсе булды^[7].^[8]

• Валитова Н. Народный артист Башкирии Роберт Юлдашев: «Сукачев сказал, что в курае звучит сама вечность». Средство массовой информации — сетевое издание «Новостной портал ProUfu.ru». 2015, 27 июня^[9].
• Ҡотлогилдина З. Моңдоң милләте юҡ, моңдоң көсө бар. «Башҡортостан» гәзите, 2012, 24 февраль^[10]
• Баймөхәмәтов А. Ҡурай менән Йыһан бәйләнеше. «Башҡортостан» гәзите, 2012, 16 февраль^[11].
• Лежень Ю. Роберт Юлдашев мог выступать за «Салават Юлаев», а играет на курае. «Медиакорсеть» сайты, 2012, 15 февраль^[1].

• Салауат Юлаев ордены (2022)^[12]
• Башҡортостан Республикаһының халыҡ артисы (2012)
• Ғата Сөләймәнов исемендәге ҡурайсылар конкурсында Гран-при
• Йомабай Иҫәнбаев исемендәге ҡурайсылар конкурсында Гран-при
• «Тюрксой» Халыҡ-ара ойошмаһы үткәргән конкурста беренсе премия
• Шәйехзада Бабич исемендәге дәүләт республика йәштәр премияһы (2003)

• Юлдашев Роберт Нәжип улы // Башҡорт энциклопедияһы. — Өфө: Башҡорт энциклопедияһы (ғилми-нәшриәт комплексы), 2015—2020. — ISBN 978-5-88185-306-8.
• Международное артистическое агентство 2012 йылдың 5 май көнөндә архивланған.
• Радий Хабиров в День работника культуры наградил выдающихся представителей отрасли